శాంతిభద్రతలకు విఘాతం కలిగిస్తే కఠిన చర్యలు - సీఐ గోపతి రవీందర్
సూర్య నస్పూర్:పాత నేరస్తులు తమ ప్రవర్తన మార్చుకొని సమాజంలో గౌరవప్రదంగా జీవించాలని, లేనిపక్షంలో వారిపై రౌడీషీట్లు తెరుస్తామని మంచిర్యాల రూరల్ సీఐ గోపతి రవీందర్ హెచ్చరించారు. శుక్రవారం సీసీసీ నస్పూర్ పోలీస్ స్టేషన్ పరిధిలోని పలువురు పాత నేరస్తుల ఇళ్లకు స్వయంగా వెళ్లి వారితో మాట్లాడారు. ఈ సందర్భంగా ఆయన మాట్లాడుతూ, అసాంఘిక కార్యకలాపాలకు పాల్పడుతూ శాంతిభద్రతలకు విఘాతం కలిగించే వారిని ఎట్టి పరిస్థితుల్లోనూ ఉపేక్షించేది లేదని స్పష్టం చేశారు.గతంలో నమోదైన కేసులు, ప్రస్తుత ప్రవర్తన, జీవన విధానం తదితర వివరాలను అడిగి తెలుసుకున్నారు. ఈ సందర్భంగా వారికి కౌన్సెలింగ్ నిర్వహించి పలు సూచనలు చేశారు. గతంలో నేరాలకు పాల్పడిన వారు ఇకపై అలాంటి చర్యలకు దూరంగా ఉండాలని, చట్టవ్యతిరేక కార్యకలాపాలకు పాల్పడకుండా కుటుంబ సభ్యులతో కలిసి ప్రశాంతమైన జీవితం గడపాలని సీఐ సూచించారు. పోలీసుల నిఘా నిరంతరం ఉంటుందని, ప్రవర్తనలో మార్పు రాకుండా తిరిగి నేరాలకు పాల్పడితే రౌడీషీట్లు తెరవడంతో పాటు చట్టప్రకారం కఠిన చర్యలు తీసుకుంటామని హెచ్చరించారు. ఈ కార్యక్రమంలో పోలీస్ సిబ్బంది పాల్గొన్నారు.