సీసీటీఎన్ఎస్ అప్‌డేషన్లు, నూతన క్రిమినల్ చట్టాల అమలుపై సీపీ సమీక్ష
కేసుల పరిష్కారంలో గడువును తప్పనిసరిగా పాటించాలి: సైబరాబాద్ పోలీస్ కమిషనరేట్ లో సీపీ డా. ఎం.రమేశ్
సైబరాబాద్ సిటీ బ్యూరో, మేజర్ న్యూస్ (అక్టోబర్ 23): సైబరాబాద్ పోలీస్ కమిషనర్ డా. ఎం. రమేశ్ శుక్రవారం సైబరాబాద్ పోలీస్ కమిషనరేట్ పరిధిలోని అన్ని జోన్ల డీసీపీలు, అదనపు డీసీపీలు, ఏసీపీలు, స్టేషన్ హౌస్ ఆఫీసర్లు (ఎస్ హెచ్ ఓ లు), అన్ని ఇతర విభాగాల అధికారులతో వీడియో కాన్ఫరెన్స్ ద్వారా సమీక్షా సమావేశం నిర్వహించారు. సీసీటీఎన్ఎస్ అప్‌డేషన్ల పురోగతి, నూతన క్రిమినల్ చట్టాల అమలు తీరును ఈ సందర్భంగా సమీక్షించారు.
ఈ అంశాలపైనే సమీక్ష
ఈ-సాక్ష్య: నేర పరిశోధనల్లో ఎలక్ట్రానిక్ ఆధారాలను పద్ధతిగా సేకరించడం, నమోదు చేయడం, భద్రపరచడం కోసం ఈ-సాక్ష్య యాప్‌ను సమర్థవంతంగా వినియోగించాలని సూచించారు. నిర్దేశిత విధివిధానాలను తప్పనిసరిగా పాటించాలని ఆదేశించారు.
60 రోజుల గడువు: వర్తించే కేసుల్లో నిర్దేశిత 60 రోజుల వ్యవధిలో దర్యాప్తు పూర్తి చేసి, అవసరమైన నివేదికలను సమర్పించేలా చర్యలు తీసుకోవాలని సూచించారు. చట్టబద్ధమైన గడువులను ఖచ్చితంగా పాటించాలని స్పష్టం చేశారు.
. 90 రోజుల గడువు: వర్తించే కేసుల్లో 90 రోజుల చట్టబద్ధమైన గడువును పర్యవేక్షిస్తూ, దర్యాప్తు అధికారులు సకాలంలో అవసరమైన చర్యలు తీసుకొని చట్టపరమైన నిబంధనలను పాటించాలని ఆదేశించారు.
. సీసీటీఎన్ఎస్ అప్‌డేషన్లు: కేసుల వివరాలు, దర్యాప్తు పురోగతి, ఇతర సంబంధిత సమాచారాన్ని సీసీటీఎన్ఎస్ పోర్టల్‌లో ఎప్పటికప్పుడు ఖచ్చితంగా నమోదు చేయాలని సూచించారు. డిజిటల్ రికార్డుల నిర్వహణలో ఎలాంటి నిర్లక్ష్యం ఉండకూడదని స్పష్టం చేశారు.
. ఎఫ్‌ఐఆర్ సంబంధిత వివరాలు: ఎఫ్‌ఐఆర్‌లకు సంబంధించిన వివరాలను సీసీటీఎన్ఎస్‌లో సకాలంలో నమోదు చేసి, కేసుల తదుపరి ప్రక్రియలను ఎలాంటి జాప్యం లేకుండా పూర్తి చేయాలని ఆదేశించారు.
జీరో ఎఫ్‌ఐఆర్‌లు: జీరో ఎఫ్‌ఐఆర్‌ల నమోదు, బదిలీ, తదుపరి విచారణ ప్రక్రియలను నిర్దేశిత చట్టపరమైన విధానాల ప్రకారం వేగంగా పూర్తి చేయాలని సూచించారు. బాధితులకు న్యాయం అందించడంలో ఎలాంటి జాప్యం జరగకూడదని స్పష్టం చేశారు.
నిబంధనలను కచ్చితంగా అమలు చేయాలి: సీపీ
అనంతరం సీపీ డా. ఎం. రమేశ్ మాట్లాడుతూ, నూతన క్రిమినల్ చట్టాల్లోని నిబంధనలను కచ్చితంగా అమలు చేయడంతో పాటు, దర్యాప్తు, కేసుల పరిష్కారానికి నిర్దేశించిన గడువులను తప్పనిసరిగా పాటించాలని అధికారులకు సూచించారు. దర్యాప్తు నాణ్యత, నిష్పక్షపాత ధోరణి, సమగ్రతకు ప్రాధాన్యతనిస్తూ, నిర్ణీత గడువుల్లో దర్యాప్తును పూర్తి చేసి తదుపరి చర్యలు చేపట్టాలని దర్యాప్తు అధికారులను ఆదేశించారు.
అన్ని పోలీస్ స్టేషన్ల ఎస్‌హెచ్‌ఓలు, ఏసీపీలు దర్యాప్తుల పురోగతి, సీసీటీఎన్ఎస్ అప్‌డేషన్లు, ఈ-సాక్ష్య అమలు, 60 మరియు 90 రోజుల గడువుల పాటింపును ప్రతిరోజూ నిశితంగా పర్యవేక్షించాలని సీపీ ఆదేశించారు. పెండింగ్‌లో ఉన్న లోపాలను వెంటనే సరిదిద్దాలని, జాప్యానికి గల కారణాలను గుర్తించి వాటిని పరిష్కరించాలని, అమలు పురోగతిపై ఉన్నతాధికారులకు రోజువారీ నివేదికలు సమర్పించాలని స్పష్టం చేశారు.
నూతన క్రిమినల్ చట్టాల సమర్థవంతమైన అమలు, డిజిటల్ రికార్డుల ఖచ్చితమైన నిర్వహణ, దర్యాప్తు ప్రక్రియలను సకాలంలో పూర్తి చేసే విషయంలో పర్యవేక్షణాధికారులు బాధ్యతాయుతంగా వ్యవహరించాలని సీపీ పునరుద్ఘాటించారు. సమీక్షా సమావేశంలో జారీ చేసిన ఆదేశాలను ప్రతి అధికారి కచ్చితంగా పాటిస్తూ, నిరంతర పర్యవేక్షణ కొనసాగించాలని ఆదేశించారు.
