జమ్మూలో పాకిస్తానీయుల అక్రమ నివాసం: 65 మందిపై క్రైమ్ బ్రాంచ్ ఛార్జ్‌షీట్!
సూర్య నేషనల్ & క్రైమ్ బ్యూరో, జమ్మూ: జమ్మూ డివిజన్‌లోని నాలుగు సరిహద్దు జిల్లాల్లో ఏళ్ల తరబడి అక్రమంగా నివసిస్తున్న పాకిస్తానీ పౌరులు, వారికి సహకరించిన స్థానికులతో సహా మొత్తం 65 మంది నిందితులపై జమ్మూ క్రైమ్ బ్రాంచ్ స్పెషల్ క్రైమ్ వింగ్ (SCW) చార్జ్‌షీట్లు దాఖలు చేసింది. 1970ల నుంచి చెల్లుబాటు అయ్యే వీసాలతో వచ్చి గడువు ముగిసినా తిరిగి వెళ్లకుండా రహస్యంగా ఉంటున్న పాకిస్తానీయులు, పీవోకే వాసులపై ఎనిమిది వేర్వేరు కేసుల్లో సమగ్ర దర్యాప్తు పూర్తి చేసి సంబంధిత కోర్టుల్లో అభియోగపత్రాలు సమర్పించినట్లు క్రైమ్ బ్రాంచ్ అధికార ప్రతినిధి శనివారం వెల్లడించారు.
నాలుగు జిల్లాల్లో దర్యాప్తు – 50 మందిపై ప్రత్యక్ష అభియోగాలు:
జమ్మూ, పూంచ్, రాజౌరి, కథువా జిల్లాల పరిధిలోని కోర్టుల్లో ఈ చార్జ్‌షీట్లను దాఖలు చేశారు. మొత్తం 65 మంది నిందితుల్లో 50 మంది జీవించి ఉన్నవారిపై నేరుగా అభియోగాలు నమోదు చేయగా, కేసు విచారణ దశలో ఉండగానే మరణించిన మరో 15 మంది పాత్రను కూడా రికార్డుల్లో అధికారికంగా నమోదు చేశారు. పాకిస్తాన్‌లోని సింధ్, లాహోర్, గుజ్రాన్‌వాలా, సర్గోధా, మీర్‌పూర్ ప్రాంతాలతో పాటు పాక్ ఆక్రమిత కశ్మీర్ (PoK)లోని రావల్‌కోట్, కోట్లీ ప్రాంతాలకు చెందిన పలు కుటుంబాలు అఖ్నూర్, మెంధర్, తన్నామాండి, దర్హాల్, కథువాలలో తిష్టవేసినట్లు క్రైమ్ బ్రాంచ్ ప్రత్యేక దర్యాప్తు బృందం (SIT) గుర్తించింది.
నకిలీ ధ్రువపత్రాలతో ప్రభుత్వ ఉద్యోగాలు, స్థానిక వివాహాలు:
దర్యాప్తులో విస్తుపోయే వాస్తవాలు వెలుగుచూశాయి. విదేశీ పౌరసత్వాన్ని దాచిపెట్టి కొందరు స్థానిక మహిళలను వివాహం చేసుకోవడమే కాకుండా, తప్పుడు సమాచారంతో భారతీయ గుర్తింపు కార్డులు, రేషన్ కార్డులు, ఓటర్ ఐడీలు, ఆధార్ కార్డులు సంపాదించినట్లు తేలింది. వీరిలో కొందరు పాకిస్తానీయులు మోసపూరితంగా రాష్ట్ర ప్రభుత్వ ఉద్యోగాలను కూడా దక్కించుకున్నట్లు నిర్ధారణ అయింది. వారికి సహకరించిన భారతీయ జీవిత భాగస్వాములు, కుటుంబ సభ్యులు, నకిలీ పత్రాలు సృష్టించిన వ్యక్తులపై ఫారిలర్స్ యాక్ట్ 1946, పాస్‌పోర్ట్ ఎంట్రీ ఇంటు ఇండియా యాక్ట్ సహా రణబీర్ పీనల్ కోడ్ (RPC) కింద తీవ్ర అభియోగాలు మోపారు.
