రూ.30 వేల లంచం తీసుకుంటూ ఏసీబీకి చిక్కిన ఎల్లంపేట వార్డు అధికారి
మేడ్చల్, మేజర్ న్యూస్:ఎల్లంపేట మున్సిపాలిటీ కార్యాలయంలో ఏసీబీ అధికారులు దాడులు నిర్వహించి వార్డు అధికారి రవీందర్ రెడ్డిని రూ.30 వేల లంచం తీసుకుంటుండగా పట్టుకున్నట్లు సమాచారం. రావాల్కోల్ వార్డు పరిధిలోని ఓ ఫ్లాట్ అసెస్మెంట్కు సంబంధించి రిటైర్డ్ ప్రభుత్వ అధికారిని సదరు అధికారి లంచం డిమాండ్ చేసినట్లు ఆరోపణలు ఉన్నాయి. బాధితుడు ఏసీబీ అధికారులకు ఫిర్యాదు చేయడంతో రంగంలోకి దిగిన అధికారులు పక్కా ప్రణాళికతో మున్సిపల్ కార్యాలయంలోనే వలపన్ని లంచం తీసుకుంటున్న సమయంలో పట్టుకున్నట్లు తెలిసింది.ప్రజలకు పారదర్శకంగా, నిబంధనల ప్రకారం ప్రభుత్వ సేవలు అందించాల్సిన అధికారులపై లంచం ఆరోపణలు రావడం చర్చనీయాంశంగా మారింది. గతంలోనూ ఎల్లంపేట మున్సిపాలిటీలో అవినీతి, అక్రమ వసూళ్లకు సంబంధించి పలు విమర్శలు వ్యక్తమయ్యాయని స్థానికులు పేర్కొంటున్నారు. ప్రభుత్వ సేవల కోసం కార్యాలయాలకు వచ్చే ప్రజలను ఇబ్బందులకు గురిచేస్తూ లంచాలు డిమాండ్ చేస్తున్నారనే ఆరోపణలపై ఉన్నతాధికారులు దృష్టి సారించాలని ప్రజలు కోరుతున్నారు. ఈ ఘటన నేపథ్యంలో మున్సిపాలిటీలోని ఇతర విభాగాల పనితీరుపైనా సమగ్ర విచారణ చేపట్టి, అవినీతికి తావులేకుండా చర్యలు తీసుకోవాలని స్థానికులు డిమాండ్ చేస్తున్నారు.