లంచం తీసుకుంటూ ఏసీబీకి చిక్కిన ఎల్లంపేట వార్డు అధికారి!... రవీందర్ రెడ్డి
మేడ్చల్,(మేజర్ న్యూస్): ప్రజలకు పారదర్శకంగా ప్రభుత్వ సేవలు అందించాల్సిన మున్సిపల్ కార్యాలయంలోనే లంచం వ్యవహారం వెలుగుచూడటం కలకలం రేపింది. ఫ్లాట్ అసెస్మెంట్ కోసం రిటైర్డ్ ప్రభుత్వ అధికారిని రూ.30 వేలు డిమాండ్ చేసి, ఆ మొత్తాన్ని స్వీకరిస్తుండగా ఎల్లంపేట మున్సిపల్ వార్డు అధికారి రవీందర్ రెడ్డి ఏసీబీ అధికారులకు పట్టుబడినట్లు సమాచారం. వివరాల్లోకి వెళ్తే.. రావాల్కోల్ వార్డు పరిధిలోని ఓ ఫ్లాట్ అసెస్మెంట్ విషయంలో వార్డు అధికారి లంచం డిమాండ్ చేసినట్లు బాధితుడు ఏసీబీ అధికారులకు ఫిర్యాదు చేశాడు. దీంతో రంగంలోకి దిగిన ఏసీబీ అధికారులు పక్కా ప్రణాళికతో ఎల్లంపేట మున్సిపల్ కార్యాలయంలో దాడి నిర్వహించారు. ఈ క్రమంలో రూ.30 వేల లంచం స్వీకరిస్తుండగా అధికారిని పట్టుకున్నట్లు తెలిసింది. ప్రజలకు ప్రభుత్వ సేవలు అందించాల్సిన కార్యాలయాల్లోనే లంచాల వ్యవహారాలు వెలుగుచూడటంపై స్థానికులు అసహనం వ్యక్తం చేస్తున్నారు. గతంలోనూ ఎల్లంపేట మున్సిపాలిటీపై అవినీతి ఆరోపణలు, విమర్శలు వచ్చినప్పటికీ పరిస్థితిలో మార్పు కనిపించడం లేదని ఆవేదన వ్యక్తం చేస్తున్నారు. ఈ నేపథ్యంలో మున్సిపాలిటీలోని ఇతర విభాగాల పనితీరుపైనా ఉన్నతాధికారులు దృష్టి సారించి, పారదర్శక పాలనకు చర్యలు తీసుకోవాలని స్థానికులు కోరుతున్నారు.