telangana
రోడ్లపై ధాన్యం ఆరబోస్తే క్రిమినల్ చర్యలు
సత్తుపల్లి:ప్రధాన రహదారులపై ధాన్యం ఆరబోసే రైతులపై క్రిమినల్ కేసులు నమోదు చేస్తామని సత్తుపల్లి పోలీసులు తీవ్ర హెచ్చరికలు జారీ చేశారు. ఇటీవల ఆదివారం రోడ్డుపై ఆరబోసిన ధాన్యం కుప్పల కారణంగా ఓ వ్యక్తి ప్రమాదవశాత్తు తీవ్రంగా గాయపడి మృతి చెందిన నేపథ్యంలో పోలీసులు ఈ నిర్ణయం తీసుకున్నారు.
రహదారులపై పంటను ఆరబెట్టడం వల్ల వాహనదారులు ప్రమాదాల బారినపడి విలువైన ప్రాణాలు కోల్పోతున్నారని, ఇకపై రోడ్లను ధాన్యం ఆరబెట్టడానికి ఉపయోగిస్తే ఉపేక్షించేది లేదని స్పష్టం చేశారు. రైతులు తమ ధాన్యాన్ని ఐకేపీ కొనుగోలు కేంద్రాలలో లేదా సొంత కల్లాల్లో మాత్రమే ఆరబోసుకోవాలని పోలీసులు సూచించారు. నిబంధనలు ఉల్లంఘించి రోడ్లపై ధాన్యం వేస్తే చట్టపరంగా కఠిన చర్యలు తీసుకుంటామని సత్తుపల్లి పోలీసులు హెచ్చరించారు.
