telangana
రెస్క్యూ సిబ్బందికి సీఎం అభినందనలు
ఖమ్మం/హైదరాబాద్:ఖమ్మం జిల్లా సత్తుపల్లి మండలం బేతుపల్లి చెరువులో ఎదురైన క్లిష్ట పరిస్థితుల్లో ధైర్యసాహసాలు ప్రదర్శించి, రెస్క్యూ ఆపరేషన్‌ను విజయవంతం చేసిన ఎన్‌డీఆర్‌ఎఫ్ (NDRF), ఎస్‌డీఆర్‌ఎఫ్ (SDRF), అగ్నిమాపక సిబ్బందితో పాటు జిల్లా అధికారులకు తెలంగాణ ముఖ్యమంత్రి ఎ. రేవంత్ రెడ్డి ప్రత్యేక అభినందనలు తెలిపారు.
భారీ వర్షాల కారణంగా పొంగిపొర్లుతున్న బేతుపల్లి చెరువులో నీటి ఉధృతి పెరగడంతో మొదట కొందరు మత్స్యకారులు గల్లంతయ్యారు. వారిని రక్షించేందుకు నీటిలోకి వెళ్లిన ఎస్‌డీఆర్‌ఎఫ్, అగ్నిమాపక సిబ్బంది కూడా అనుకోని ప్రమాదంలో చిక్కుకుపోయారు. ఈ క్లిష్ట సమయంలో ఎన్‌డీఆర్‌ఎఫ్ సహాయక బృందాలు, జిల్లా యంత్రాంగం రంగంలోకి దిగి సమన్వయంతో శ్రమించి మత్స్యకారులతో పాటు సిబ్బంది అందరినీ సురక్షితంగా ఒడ్డుకు చేర్చాయి.
ప్రజల ప్రాణాలను కాపాడేందుకు రెస్క్యూ సిబ్బంది ప్రదర్శించిన ధైర్యసాహసాలు, అంకితభావం ప్రశంసనీయమని ముఖ్యమంత్రి కొనియాడారు. సహాయక చర్యలను క్షేత్రస్థాయిలో సమర్థవంతంగా నిర్వహించిన ఖమ్మం జిల్లా కలెక్టర్‌తో పాటు పర్యవేక్షించిన వివిధ శాఖల అధికారులు, సిబ్బంది కృషిని సీఎం రేవంత్ రెడ్డి అభినందించారు.
