రైతులకు ప్రభుత్వం అండగా ఉంటుందిః చరణ్ కౌశిక్ యాదవ్

సూర్య, తెలంగాణ బ్యూరో ప్రతినిధిః రైతుల సమస్యలపై మాజీ మంత్రి, బీఆర్ఎస్ నేత హరీశ్ రావు చేస్తున్న ఆరోపణలను తెలంగాణ లైవ్‌స్టాక్ డెవలప్‌మెంట్ ఏజెన్సీ చైర్మన్ చరణ్ కౌశిక్ యాదవ్ తీవ్రంగా ఖండించారు. రాజకీయ లబ్ధి కోసం వాస్తవాలను దాచిపెట్టి రైతులను అబద్ధాలతో తప్పుదోవ పట్టించే ప్రయత్నం చేస్తున్నారని విమర్శించారు. క్షేత్రస్థాయిలో నెలకొన్న పరిస్థితులను అర్థం చేసుకోకుండా రైతులను రెచ్చగొట్టడం సరికాదని హితవు పలికారు. ప్రస్తుత సాగునీటి సమస్యకు ప్రభుత్వం కారణం కాదని, ఎల్‌నినో వాతావరణ ప్రభావం వల్లే నీటి లభ్యత తగ్గిందని చరణ్ కౌశిక్ యాదవ్ స్పష్టం చేశారు. ఎల్‌నినో ప్రభావంపై ముందుగానే రైతులకు అవగాహన కల్పించి అప్రమత్తం చేశామని తెలిపారు. కృష్ణా బేసిన్‌లో 72 శాతం, గోదావరి బేసిన్‌లో 42 శాతం నీటి కొరత ప్రకృతి వైపరీత్యాల కారణంగా ఏర్పడిందని వివరించారు. గత పదేళ్ల బీఆర్ఎస్ పాలనలో రైతులను మోసం చేసిన చరిత్ర ఆ పార్టీకే ఉందని విమర్శించారు. ఇప్పుడు రైతుల సమస్యలను రాజకీయంగా ఉపయోగించుకోవాలని హరీశ్ రావు ప్రయత్నిస్తున్నారని మండిపడ్డారు. మరోవైపు కాంగ్రెస్ ప్రభుత్వం రైతుల సంక్షేమానికి అత్యంత ప్రాధాన్యత ఇస్తోందని తెలిపారు. రాష్ట్రవ్యాప్తంగా ధాన్యం కొనుగోలు కేంద్రాలను ప్రారంభించి సేకరణ ప్రక్రియను వేగవంతం చేశామని చెప్పారు. అకాల వర్షాల హెచ్చరికల నేపథ్యంలో ధాన్యం తడిసి పాడవకుండా జిల్లా కలెక్టర్లు, సంబంధిత అధికారులను అప్రమత్తం చేసి అవసరమైన చర్యలు చేపట్టామని వెల్లడించారు. సన్నధాన్యం పండించిన రైతులకు క్వింటాల్‌కు రూ.500 బోనస్ అందిస్తూ అదనపు ఆర్థిక ప్రయోజనం కల్పిస్తున్నామని పేర్కొన్నారు. ఎన్నికల సమయంలో ఇచ్చిన హామీ మేరకు అర్హులైన రైతులకు ఏకకాలంలో రూ.2 లక్షల రుణమాఫీ పూర్తి చేసిన ఘనత కాంగ్రెస్ ప్రభుత్వానిదేనని అన్నారు. రైతుల ప్రయోజనాల విషయంలో ప్రభుత్వం ఎక్కడా వెనక్కి తగ్గదని, ప్రతి రైతుకు అండగా ఉంటూ ప్రతి ధాన్యం గింజను కొనుగోలు చేస్తామని చరణ్ కౌశిక్ యాదవ్ స్పష్టం చేశారు.
ఎ.రవీందర్‌, హైదరాబాద్‌.