ప్రారంభోత్సవం ఆర్భాటం... కొనుగోళ్లలో మాత్రం శూన్యం! --నెల రోజులైనా పెసల కొనుగోళ్లు ప్రారంభించని అధికారులు.. --మార్క్‌ఫెడ్ కేంద్రం చుట్టూ రైతుల ప్రదక్షిణలు.. --ఉన్నతాధికారులు స్పందించాలని అన్నదాతల డిమాండ్
--ప్రారంభోత్సవం ఆర్భాటం... కొనుగోళ్లలో మాత్రం శూన్యం!
--నెల రోజులైనా పెసల కొనుగోళ్లు ప్రారంభించని అధికారులు..
--మార్క్‌ఫెడ్ కేంద్రం చుట్టూ రైతుల ప్రదక్షిణలు..
--ఉన్నతాధికారులు స్పందించాలని అన్నదాతల డిమాండ్
వైరా రూరల్ (సూర్య న్యూస్):- అక్టోబర్ 30:
ప్రారంభోత్సవం నాడు ఆర్భాటం.. ఆ తర్వాత అన్నదాతలకు అవస్థలు! రైతులకు అండగా నిలవాల్సిన ప్రభుత్వ కొనుగోలు కేంద్రంలోనే పెసల కొనుగోళ్లు ముందుకు సాగకపోవడంతో రైతులు తీవ్ర ఆవేదన వ్యక్తం చేస్తున్నారు. వైరా ఎమ్మెల్యే రాందాస్ నాయక్ మార్క్‌ఫెడ్ పెసల కొనుగోలు కేంద్రాన్ని ప్రారంభించి నెల రోజులు కావస్తున్నా, ఇప్పటివరకు ఒక్క అడుగు కూడా కొనుగోళ్ల దిశగా పడకపోవడంపై రైతాంగం తీవ్ర అసహనం వ్యక్తం చేస్తోంది.
పెసల పంట చేతికొచ్చి విక్రయించుకునేందుకు రైతులు సిద్ధంగా ఉన్నా, కొనుగోలు కేంద్రంలో మాత్రం కొనుగోళ్లు ప్రారంభం కాకపోవడంతో అన్నదాతలు ఆందోళన చెందుతున్నారు. రోజులు గడుస్తున్నా అధికారుల నుంచి స్పష్టమైన హామీ లేకపోవడంతో కేంద్రం చుట్టూ తిరగడమే రైతులకు పనిగా మారింది. ఇదే విషయమై మార్క్‌ఫెడ్ అధికారులను రైతులు నిలదీయగా, వారం రోజుల క్రితం ఖమ్మం గోదాముకు పంపించిన పెసల లారీల్లో నాణ్యత లోపాలు ఉన్నాయనే కారణంతో అక్కడి అధికారులు వాటిని వెనక్కి పంపించారని చెప్పినట్లు రైతులు వెల్లడించారు.
అంతేకాకుండా, ఇప్పటికే ఖమ్మం గోదాముకు పంపించిన పెసలను అక్కడ దిగుమతి చేసుకుంటేనే వైరా కేంద్రంలో కొత్తగా కొనుగోళ్లు చేపడతామని, లేదంటే తాము ఏమీ చేయలేమని అధికారులు సమాధానమిస్తున్నారని రైతులు ఆరోపిస్తున్నారు. గోదాములో సమస్య ఉంటే దాన్ని పరిష్కరించాల్సిన బాధ్యత అధికారులదే తప్ప, ఆ సమస్యను సాకుగా చూపుతూ రైతులను ఇబ్బందులకు గురిచేయడం ఎంతవరకు సమంజసమని ప్రశ్నిస్తున్నారు.
ఒకవైపు పంటను విక్రయించుకోలేక, మరోవైపు పెట్టుబడులు, అప్పుల భారం భరించలేక రైతులు తీవ్ర ఒత్తిడికి గురవుతున్నారు. ప్రజాప్రతినిధుల సమక్షంలో ప్రారంభమైన కొనుగోలు కేంద్రంలోనే నెల రోజులుగా కొనుగోళ్లు జరగకపోవడం అధికారుల పనితీరుపై ప్రశ్నలు రేకెత్తిస్తోంది. ప్రారంభోత్సవానికి చూపిన చొరవ కొనుగోళ్ల నిర్వహణలో ఎందుకు కనిపించడం లేదని అన్నదాతలు నిలదీస్తున్నారు.
ఇప్పటికైనా జిల్లా ఉన్నతాధికారులు స్పందించి ఖమ్మం గోదాములో పెసల దిగుమతి సమస్యను పరిష్కరించడంతోపాటు వైరా మార్క్‌ఫెడ్ కొనుగోలు కేంద్రంలో తక్షణమే కొనుగోళ్లు ప్రారంభించాలని రైతులు డిమాండ్ చేస్తున్నారు. లేదంటే కొనుగోలు కేంద్రం ప్రారంభించినా రైతులకు ఒరిగిందేమీ లేదన్న విమర్శలు మరింత బలపడే అవకాశం ఉంది.
