ఓఆర్ఎస్‌ అనుకుని ఎలుకల మందు తాగి వృద్ధురాలు మృతి
ఘట్కేసర్, మేజర్ న్యూస్:ఓఆర్ఎస్‌ ప్యాకెట్‌ అనుకుని పొరపాటున ఎలుకల మందు తాగిన వృద్ధురాలు చికిత్స పొందుతూ మృతి చెందిన ఘటన ఘట్కేసర్ పోలీస్‌ స్టేషన్‌ పరిధిలోని ఎదులాబాద్‌లో చోటుచేసుకుంది. పోలీసులు తెలిపిన వివరాల ప్రకారం ఎదులాబాద్‌కు చెందిన తోటకూర రాములమ్మ (73) కొంతకాలంగా మధుమేహం, ఇతర అనారోగ్య సమస్యలతో బాధపడుతోంది. ఈ క్రమంలో నవంబర్‌ 12న మధ్యాహ్నం ఆమె ఆరోగ్యం ఒక్కసారిగా క్షీణించడంతో కుటుంబ సభ్యులు స్థానిక ఆర్‌ఎంపీ వైద్యుడు గోపీకృష్ణను ఇంటికి పిలిపించారు. పరీక్షల సందర్భంగా ముందు రోజు రాత్రి తీవ్ర నీరసంతో ఓఆర్ఎస్‌ ప్యాకెట్‌ అనుకుని ఎలుకల మందు తాగినట్లు వైద్యుడికి తెలిపింది. దీంతో వైద్యుడి సూచన మేరకు కుటుంబ సభ్యులు ఆమెను ఘట్కేసర్ ప్రభుత్వ ఆసుపత్రికి తరలించారు. అక్కడ చికిత్స పొందుతూ సాయంత్రం 6.55 గంటలకు మృతి చెందినట్లు విధుల్లో ఉన్న వైద్యుడు నిర్ధారించారు. ఈ ఘటనపై మృతురాలి కుమారుడు తోటకూర మల్లేష్‌ పోలీసులకు ఫిర్యాదు చేశారు. తన తల్లి మృతికి గల కారణాలపై సమగ్ర విచారణ జరిపి చట్టప్రకారం చర్యలు తీసుకోవాలని కోరారు. ఫిర్యాదు మేరకు పోలీసులు ఘటనపై విచారణ చేపట్టాల్సి ఉంది.
