నేడు ముంబైకి సీఎం రేవంత్ రెడ్డి.. రేపు మహారాష్ట్ర సీఎంతో కీలక భేటీ!

హైదరాబాద్: తెలంగాణ ముఖ్యమంత్రి రేవంత్ రెడ్డి నేటి సాయంత్రం ముంబై పర్యటనకు వెళ్లనున్నారు. రాత్రి 7 గంటలకు హైదరాబాద్ నుంచి బయలుదేరి ముంబై చేరుకోనున్న సీఎం, ఈ రాత్రికి అక్కడే బస చేస్తారు.

ఈ పర్యటనలో భాగంగా రేపు ఉదయం 11 గంటలకు మహారాష్ట్ర ముఖ్యమంత్రి దేవేంద్ర ఫడ్నవీస్‌తో సీఎం రేవంత్ రెడ్డి ప్రత్యేకంగా భేటీ కానున్నారు. రెండు రాష్ట్రాల మధ్య దీర్ఘకాలంగా ఉన్న నీటిపారుదల ప్రాజెక్టుల అంశాలు, ముఖ్యంగా కీలకమైన తుమ్మిడిహెట్టి ప్రాజెక్టు నిర్మాణానికి సంబంధించి ఈ సమావేశంలో ప్రధానంగా చర్చించనున్నారు.

ఈ కీలక సమావేశానికి తెలంగాణ నీటిపారుదల శాఖ మంత్రి ఉత్తమ్ కుమార్ రెడ్డితో పాటు ఆ శాఖ ఉన్నతాధికారులు కూడా హాజరుకానున్నారు. తుమ్మిడిహెట్టి ప్రాజెక్టుపై నెలకొన్న చిక్కుముడులను విప్పడం మరియు రెండు రాష్ట్రాల మధ్య సమన్వయం సాధించడమే ఈ భేటీ యొక్క ముఖ్య ఉద్దేశమని తెలుస్తోంది.