మందమర్రిలో వైభవంగా రామ్‌లీలా ఉత్సవాలు
• చెడుపై మంచి విజయానికి ప్రతీకగా రాక్షస సంహారం
• హాజరైన మంత్రి వివేక్ వెంకటస్వామి, కలెక్టర్ కుమార్ దీపక్
సూర్య, మందమర్రి : చెడుపై మంచి, అధర్మంపై ధర్మం సాధించిన విజయానికి ప్రతీకగా నిలిచే విజయదశమి వేడుకలను మందమర్రిలో ఘనంగా నిర్వహించారు. దసరా పర్వదినాన్ని పురస్కరించుకొని సింగరేణి ఆధ్వర్యంలో మంగళవారం మందమర్రి సింగరేణి ఉన్నత పాఠశాల మైదానంలో నిర్వహించిన రామ్‌లీలా, రాక్షస సంహార కార్యక్రమాలు ప్రజలను విశేషంగా ఆకట్టుకున్నాయి. సంప్రదాయబద్ధంగా సాగిన రాక్షస సంహార ఘట్టంతో పండుగ ప్రాంగణం సందడిగా మారింది. ఈ వేడుకలకు రాష్ట్ర కార్మిక, ఉపాధి శిక్షణ, కర్మాగారాలు, గనులు, భూగర్భ శాఖ మంత్రి గడ్డం వివేక్ వెంకటస్వామి దంపతులు, జిల్లా కలెక్టర్ కుమార్ దీపక్, ఇన్‌చార్జి న్యాయమూర్తి నిరోష, సింగరేణి ఏరియా జనరల్ మేనేజర్ ఎన్. రాధాకృష్ణ, వాసిరెడ్డి సీతారామయ్య తదితరులు హాజరయ్యారు. రామ్‌లీలా ప్రదర్శనతో పాటు రాక్షస సంహార ఘట్టం విజయదశమి పండుగ వైభవాన్ని చాటిచెప్పింది. ధర్మం, సత్యం, న్యాయం ఎప్పటికైనా విజయాన్ని సాధిస్తాయనే సందేశాన్ని ఈ వేడుకలు ప్రజలకు అందించాయి. చెడును విడనాడి సన్మార్గంలో నడవాలని, ధర్మబద్ధమైన జీవన విధానాన్ని అలవర్చుకోవాలని విజయదశమి పండుగ ప్రబోధిస్తుందని ఉత్సవాల సందర్భంగా చాటిచెప్పారు. ఈ కార్యక్రమంలో ప్రజలు, ఉత్సవ నిర్వాహకులు, సింగరేణి అధికారులు, ఇతర ప్రముఖులు పాల్గొన్నారు.
