కేసీఆర్‌దే హాలిడే.. కాంగ్రెస్ ప్రభుత్వానికి కాదు: ఆది శ్రీనివాస్
సూర్య బ్యూరో ప్రతినిధి : అధికారం కోల్పోయిన మాజీ సీఎం కేసీఆర్‌ ఫామ్‌హౌస్‌లో విశ్రాంతి తీసుకుంటున్నారని, రాష్ట్రంలో ఆయనకు తప్ప మరెవరికీ హాలిడే లేదని ప్రభుత్వ విప్ ఆది శ్రీనివాస్ వ్యాఖ్యానించారు. కాంగ్రెస్ ప్రభుత్వానికి హాలిడే ఇవ్వాలన్న కేటీఆర్ వ్యాఖ్యలను ఆయన తప్పుబట్టారు. అహంకారం, అక్కసుతో కేటీఆర్ అసత్య ఆరోపణలు చేస్తున్నారని విమర్శించారు. మూసీ పునరుజ్జీవన ప్రాజెక్టుపై కేటీఆర్ తప్పుడు ప్రచారం చేస్తున్నారని ఆది శ్రీనివాస్ ఆరోపించారు. తొలి దశలో 21 కిలోమీటర్ల మేర పనులకు డీపీఆర్ రూపొందించి, రూ.7,345 కోట్లతో టెండర్లు పిలిచినట్లు తెలిపారు. మూసీపై నిర్వహించింది ప్రజాభిప్రాయ సేకరణ కాదని, స్టేక్‌హోల్డర్ల సంప్రదింపుల సమావేశమని స్పష్టం చేశారు.
రాష్ట్రంలో కరువు, విద్యుత్ కోతలు ఉన్నాయన్న కేటీఆర్ ఆరోపణలను ఆయన ఖండించారు. 20 వేల మెగావాట్ల విద్యుత్ డిమాండ్ వచ్చినా సరఫరా చేశామని, రైతులకు విద్యుత్ అందించేందుకు అవసరమైన విద్యుత్‌ను కొనుగోలు చేశామని చెప్పారు. ప్రభుత్వం క్రాప్ హాలిడే ప్రకటించలేదని, అధిక నీటి వినియోగం ఉండే పంటలకు బదులుగా ఆరుతడి పంటలు సాగు చేయాలని సూచించిందని వివరించారు.
కన్నెపల్లి వద్ద నీటిని ఎత్తిపోకుండా ఆంధ్రప్రదేశ్‌కు తరలించారన్న ఆరోపణలను కూడా ఆయన తోసిపుచ్చారు. కాళేశ్వరం బ్యారేజీల్లో నీటి నిల్వపై ఎన్డీఎస్ఏ సూచనలను పాటిస్తున్నామని, దేవాదుల, సీతారామసాగర్ ప్రాజెక్టుల ద్వారా గోదావరి నీటిని వినియోగించుకునేందుకు చర్యలు తీసుకుంటున్నామని తెలిపారు. రైతులకు అండగా నిలవాల్సిన ప్రతిపక్షం రాజకీయ విమర్శలకే పరిమితమవుతోందని ఆది శ్రీనివాస్ విమర్శించారు. ప్రభుత్వంపై చేస్తున్న ఆరోపణలకు వాస్తవాలతో సమాధానం చెబుతామని పేర్కొన్నారు.
