హైదరాబాద్‌లో భారీగా అక్రమ డిఫెన్స్ మద్యం స్వాధీనం: మాజీ సైనికులపై కేసు
హైదరాబాద్: నగరంలోని అల్వాల్ ప్రాంతంలో అక్రమంగా నిల్వ ఉంచిన డిఫెన్స్ (మిలిటరీ) మద్యాన్ని ఎక్సైజ్ టాస్క్‌ఫోర్స్ మరియు ఎన్‌ఫోర్స్‌మెంట్ అధికారులు తాజాగా జరిపిన దాడుల్లో స్వాధీనం చేసుకున్నారు. అందిన ముందస్తు సమాచారం మేరకు రెండు వేర్వేరు ప్రాంతాల్లో ఏకకాలంలో దాడులు నిర్వహించిన అధికారులు, మొత్తం 163 మద్యం బాటిళ్లను జప్తు చేశారు. సీజ్ చేసిన ఈ మద్యం మొత్తం విలువ సుమారు రూ. 2.11 లక్షలు ఉంటుందని ఎక్సైజ్ అధికారులు వెల్లడించారు.
మిలిటరీ క్యాంటీన్ (CSD) ద్వారా మాజీ సైనికులకు కేటాయించిన సబ్సిడీ మద్యాన్ని కొంతమంది లాభార్జనే ధ్యేయంగా బయటి వ్యక్తులకు అక్రమంగా విక్రయిస్తున్నట్లు విచారణలో తేలింది. ఈ అక్రమ విక్రయాలకు పాల్పడుతున్న మాజీ సైనికులపై తెలంగాణ ఎక్సైజ్ చట్టం కింద కేసులు నమోదు చేసి, తదుపరి విచారణ జరుపుతున్నారు. సైనిక నిబంధనల ప్రకారం వారి క్యాంటీన్ కార్డుల రద్దుకు కూడా సంబంధిత అధికారులకు సిఫారసు చేయనున్నట్లు ఎక్సైజ్ సిబ్బంది తెలిపారు.
