గచ్చిబౌలిలో అమెరికన్ పౌరుడి అనుమానాస్పద మృతి

 హైదరాబాద్:నగరంలోని ప్రముఖ ఐటీ కారిడార్ గచ్చిబౌలి పరిధిలో ఒక అమెరికన్ పౌరుడు అనుమానాస్పదంగా మృతి చెందిన ఘటన స్థానికంగా కలకలం రేపింది. మారియట్ ఎగ్జిక్యూటివ్ అపార్ట్‌మెంట్స్‌లో ఈ ఘటన చోటుచేసుకుంది.

మృతుడిని అమెరికాకు చెందిన మిచెల్ బ్రియాన్ లీ (41)గా పోలీసులు గుర్తించారు. వ్యాపార సంబంధిత పనుల నిమిత్తం హైదరాబాద్‌ వచ్చిన మిచెల్, గచ్చిబౌలిలోని మారియట్ ఎగ్జిక్యూటివ్ అపార్ట్‌మెంట్స్‌లో బస చేశారు. ఈ క్రమంలో ఆయన తన గదిలోనే మృతి చెంది ఉండటాన్ని గమనించిన హోటల్ సిబ్బంది వెంటనే పోలీసులకు సమాచారం అందించారు.

సమాచారం అందుకున్న గచ్చిబౌలి పోలీసులు సంఘటనా స్థలానికి చేరుకుని పరిశీలించారు. ఈ ఘటనపై కేసు నమోదు చేసుకున్న పోలీసులు మృతికి గల కారణాలపై దర్యాప్తు జరుపుతున్నారు. మిచెల్ మృతికి సంబంధించి అమెరికన్ ఎంబసీకి మరియు ఆయన కుటుంబ సభ్యులకు అధికారులు సమాచారం అందించారు.