ఎండుతున్న వరి పంటలు

*--ఎల్‌నినో ప్రభావంతోబిబోర్లు బంద్‌.*

 *--విద్యుత్‌ సమస్య.. పశువులకు మేతగా మారుతున్న పంటలు* 

నవాబుపేట సూర్య న్యూస్:

మండలంలో ఎల్‌నినో ప్రభావంతో భూగర్భ జలాలు అడుగంటిపోవడంతో వరి రైతులు తీవ్ర ఇబ్బందులు ఎదుర్కొంటున్నారు.దాదాపు మండలవ్యాప్తంగా ఇదే పరిస్థితి నెలకొనడంతో రైతులు ఆందోళన చెందుతున్నారు.సాగు చేసిన పంటలకు నీరందక పొలాలు ఎండిపోతుండటంతో పెట్టుబడులు కూడా చేతికి అందని పరిస్థితి ఏర్పడింది.కారుకొండ గ్రామానికి చెందిన రైతు గోపాల్‌ మూడు ఎకరాల్లో వరి సాగు చేయగా,భూగర్భ జలాలు పూర్తిగా పడిపోవడంతో బోరు పనిచేయడం లేదు.దీంతో రెండు ఎకరాల్లో వరి పంట పూర్తిగా ఎండిపోయింది.గత్యంతరం లేక ఎండిపోయిన పంటలో పశువులను మేపాల్సిన దుస్థితి ఏర్పడింది.పెట్టుబడులు పెట్టి సాగు చేసిన పంట కళ్లముందే ఎండిపోవడంతో రైతు తీవ్ర ఆవేదన వ్యక్తం చేస్తున్నాడు.మరోవైపు రుద్రారం గ్రామానికి చెందిన రైతు రామచంద్రయ్య నాలుగు ఎకరాల్లో వరి సాగు చేశాడు.ఎల్‌నినో ప్రభావంతో భూగర్భ జలాలు తగ్గిపోవడం,దీనికి తోడు విద్యుత్‌ సమస్యలు ఎదురవడంతో పంటకు సరిపడా నీరు అందించలేకపోతున్నాడు. పంటను కాపాడుకునేందుకు ప్రయత్నించినా ఫలితం లేకపోవడంతో ఆవేదన చెందుతున్నాడు.పశువులకు మేతగా మారుతున్న పంటలు మండలంలోని పలు గ్రామాల్లో వరి పంటలు నీరందక ఎండిపోతున్నాయి.గత్యంతరం లేక రైతులు ఎండిపోయిన పంటల్లో పశువులను మేపుతూ బాధపడుతున్నారు.అప్పులు చేసి పెట్టుబడులు పెట్టిన రైతులకు పంట నష్టాలు తీవ్ర ఆర్థిక భారాన్ని మిగులుస్తున్నాయి.పచ్చని పొలాలు కళ్లముందే ఎండిపోవడం,పశువులకు మేతగా మారడం చూసి రైతులు కన్నీటి పర్యంతమవుతున్నారు.ప్రభుత్వం ఆదుకోవాలి దాదాపు మండలవ్యాప్తంగా ఇదే పరిస్థితి నెలకొన్న నేపథ్యంలో ప్రభుత్వం స్పందించి క్షేత్రస్థాయిలో పంట నష్టాలను అంచనా వేయాలని రైతులు కోరుతున్నారు.ఎండిపోయిన వరి పంటలకు నష్టపరిహారం అందించి తమను ఆదుకోవాలని విజ్ఞప్తి చేస్తున్నారు.