దివ్యాంగులకు సేవ చేయడం అత్యంత గొప్ప విషయంః మంత్రి సీతక్క
సూర్య, తెలంగాణ బ్యూరో ప్రతినిధిః మేడ్చల్–మల్కాజిగిరి జిల్లాలోని జవహర్నగర్లో దివ్యాంగుల కోసం సేవలందిస్తున్న స్వయంకృషి సంస్థను రాష్ట్ర పంచాయతీరాజ్, గ్రామీణాభివృద్ధి, గ్రామీణ నీటి సరఫరా, మహిళా శిశు సంక్షేమ శాఖల మంత్రి డా. దనసరి అనసూయ సీతక్క సోమవారం సందర్శించారు. స్వయంకృషి సంస్థలోని దివ్యాంగులను మంత్రి సీతక్క ఆప్యాయంగా కలిసి వారితో మాట్లాడారు. వారి యోగక్షేమాలను అడిగి తెలుసుకున్నారు. దివ్యాంగుల కోసం సంస్థ అందిస్తున్న సేవలు, చేపడుతున్న కార్యక్రమాలను సంస్థ ప్రతినిధులను అడిగి తెలుసుకున్నారు.గత 35 సంవత్సరాలుగా స్వయంకృషి సంస్థ ఎలాంటి లాభాపేక్ష లేకుండా పూర్తిగా సేవా దృక్పథంతో దివ్యాంగుల సంక్షేమం కోసం పనిచేయడం అభినందనీయమని మంత్రి సీతక్క అన్నారు. సంస్థ నిర్వాహకులు, ప్రతినిధులను ఆమె అభినందించారు. రిటైర్డ్ ఐపీఎస్ అధికారి జేడీ లక్ష్మీనారాయణకు సమీప బంధువైన సురేష్ ఆధ్వర్యంలో స్వయంకృషి సంస్థ మూడు దశాబ్దాలకు పైగా దివ్యాంగుల సేవలో కొనసాగుతోందని తెలిపారు. దివ్యాంగులకు సేవ చేయడం అత్యంత గొప్ప విషయమని మంత్రి సీతక్క అన్నారు. సమాజంలో ప్రతి ఒక్కరికీ గౌరవం, సమాన అవకాశాలు కల్పించాలన్నదే ప్రజా ప్రభుత్వ లక్ష్యమని పేర్కొన్నారు. “మానవసేవే మాధవసేవ. దివ్యాంగులకు అండగా నిలవడం, వారి జీవితాల్లో ఆత్మవిశ్వాసాన్ని నింపడం నిజమైన సేవ. ఎలాంటి లాభాపేక్ష లేకుండా 35 ఏళ్లుగా స్వయంకృషి సంస్థ అందిస్తున్న సేవలు స్ఫూర్తిదాయకం” అని మంత్రి సీతక్క అన్నారు. దివ్యాంగుల సంక్షేమం, వారి సాధికారత కోసం స్వచ్ఛంద సంస్థలు అందిస్తున్న సహకారం ఎంతో విలువైనదని మంత్రి పేర్కొన్నారు.
ఎ.రవీందర్, హైదరాబాద్.