రాష్ట్ర డీజీపీ కార్యాలయంలో వైభవంగా దుర్గాపూజ, ఆయుధపూజ: ప్రత్యేక పూజలు నిర్వహించిన డీజీపీ సీవీ ఆనంద్.. హాజరైన ఉన్నతాధికారులు!

సూర్య క్రైమ్ & అడ్మినిస్ట్రేషన్ డెస్క్, హైదరాబాద్: దసరా శరన్నవరాత్రి ఉత్సవాలను పురస్కరించుకుని రాష్ట్ర పోలీసు ప్రధాన కార్యాలయంలో దుర్గాపూజ, ఆయుధపూజ కార్యక్రమాలు అత్యంత భక్తిశ్రద్ధలతో, వైభవంగా జరిగాయి. సోమవారం నాడు డీజీపీ కార్యాలయ ఆవరణలో నిర్వహించిన ఈ ప్రత్యేక పూజా కార్యక్రమంలో డీజీపీ శ్రీ సి. వి. ఆనంద్ పాల్గొని శాస్త్రోక్తంగా పూజలు నిర్వహించారు. శాంతిభద్రతల పరిరక్షణలో వినియోగించే ఆయుధాలు, పోలీసు వాహనాలకు ప్రత్యేకంగా పూలమాలలు వేసి, వేద మంత్రోచ్ఛారణల నడుమ హారతి ఇచ్చి పూజా క్రతువును పూర్తి చేశారు.

శాంతిభద్రతల పరిరక్షణకు అమ్మవారి ఆశీస్సులు:
పూజా కార్యక్రమాల అనంతరం డీజీపీ సి. వి. ఆనంద్ మాట్లాడుతూ.. రాష్ట్ర ప్రజలందరూ ఆయురారోగ్యాలు, సుఖసంతోషాలతో వర్ధిల్లాలని జగన్మాత దుర్గాదేవిని ప్రార్థించినట్లు తెలిపారు. రేయింబవళ్లు ప్రజారక్షణ, శాంతిభద్రతల పరిరక్షణ కోసం విధులు నిర్వర్తించే పోలీసు యంత్రాంగానికి అమ్మవారి ఆశీస్సులు ఎల్లప్పుడూ ఉండాలని ఆకాంక్షించారు. విధి నిర్వహణలో కర్తవ్యనిష్ఠ, అంకితభావంతో పాటుగా ఆధ్యాత్మిక బలం పోలీసు సిబ్బందిలో మానసిక ధైర్యాన్ని, స్థైర్యాన్ని మరింత పెంపొందిస్తుందని పేర్కొన్నారు.

పాల్గొన్న ఉన్నత స్థాయి పోలీసు అధికారులు:
ఈ సాంప్రదాయ ఆయుధపూజ కార్యక్రమంలో డీజీ శ్రీ మహేష్‌ భగవత్‌, ఏఐజీ (అడ్మిన్) శ్రీ రమణ కుమార్, స్టోర్స్ డిఎస్పీ, చీఫ్ సెక్యూరిటీ ఆఫీసర్ (CSO)లతో పాటు పలు విభాగాలకు చెందిన ఉన్నత పోలీసు అధికారులు, సిబ్బంది పెద్ద సంఖ్యలో పాల్గొన్నారు. పూజల అనంతరం అధికారులు, సిబ్బందికి తీర్థప్రసాదాలను అందజేశారు.