దబిల్‌గూడలో ఆర్థిక సమ్మిళిత పథకాల ప్రచారం ప్రారంభం
బ్యాంకింగ్ సేవలపై అవగాహన.. రీ-కేవైసీ, నామినేషన్ల నమోదుకు ప్రత్యేక కౌంటర్లు
రంగారెడ్డి : కేంద్ర ప్రభుత్వం అమలు చేస్తున్న ఆర్థిక సమ్మిళిత పథకాలను ప్రజలకు చేరువ చేసేందుకు చేపట్టిన రాష్ట్రవ్యాప్త ప్రచారాన్ని రంగారెడ్డి జిల్లా మహేశ్వరం మండలం దబిల్‌గూడ గ్రామ పంచాయతీలో శుక్రవారం ప్రారంభించారు. కేంద్ర ఆర్థిక సేవల విభాగం నిర్దేశించిన మేరకు అక్టోబర్‌ 21 నుంచి డిసెంబర్‌ 31 వరకు నిర్వహించనున్న ఈ ప్రచారంలో భాగంగా తెలంగాణ రాష్ట్ర స్థాయి బ్యాంకర్ల కమిటీ (ఎస్‌ఎల్‌బీసీ) ఆధ్వర్యంలో ఈ శిబిరాన్ని ఏర్పాటు చేశారు. రంగారెడ్డి లీడ్‌ బ్యాంక్‌ కార్యాలయం, ఎస్‌బీఐ అమీర్‌పేట శాఖ సహకారంతో కార్యక్రమం నిర్వహించారు.
ఈ కార్యక్రమానికి ముఖ్య అతిథిగా ఆర్‌బీఐ హైదరాబాద్‌ ప్రాంతీయ సంచాలకులు చిన్మయ్‌ కుమార్‌, గౌరవ అతిథిగా ఎస్‌బీఐ హైదరాబాద్‌ సర్కిల్‌ చీఫ్‌ జనరల్‌ మేనేజర్‌ నీలేష్‌ ద్వివేది హాజరయ్యారు. ఎస్‌బీఐ జనరల్‌ మేనేజర్‌, తెలంగాణ ఎస్‌ఎల్‌బీసీ కన్వీనర్‌ సతీష్‌ కుమార్‌ మాట్లాడుతూ, ప్రచార లక్ష్యాలను వివరించారు. గ్రామ పంచాయతీలు, పట్టణ స్థానిక సంస్థల్లో నిర్వహించే శిబిరాల ద్వారా ప్రజలకు వివిధ బ్యాంకింగ్ సేవలు అందుబాటులోకి వస్తాయని తెలిపారు.
ఆర్‌బీఐ జనరల్‌ మేనేజర్‌ జ్ఞాన సుప్రభాత్‌ ఎం. మాట్లాడుతూ ప్రధానమంత్రి జీవన్‌ జ్యోతి బీమా యోజన, ప్రధానమంత్రి సురక్షా బీమా యోజన, అటల్‌ పెన్షన్‌ యోజన వంటి పథకాల ప్రయోజనాలను వివరించారు. బ్యాంకు ఖాతాదారులు రీ-కేవైసీ ప్రక్రియను పూర్తి చేయడంతోపాటు, తమ ఖాతాల్లో నామినీ వివరాలను నమోదు చేసుకోవాలని, అవసరమైతే వాటిని సవరించుకోవాలని సూచించారు.
జిల్లా కలెక్టర్‌ ఆదేశాల మేరకు జిల్లా యంత్రాంగం తరఫున పాల్గొన్న రంగారెడ్డి జిల్లా గ్రామీణాభివృద్ధి అధికారి (డీఆర్‌డీఓ) ఎల్‌. శ్రీలత మాట్లాడుతూ, ప్రచారాన్ని విజయవంతం చేసేందుకు జిల్లా యంత్రాంగం నుంచి అవసరమైన సహకారం అందిస్తామని వెల్లడించారు. నాబార్డు హైదరాబాద్‌ డీజీఎం ఎంవీఎస్‌ఎస్‌ శ్రీనివాస్‌ కూడా కార్యక్రమంలో ప్రసంగించారు.
500 మందికి సేవలు
ఈ శిబిరంలో సుమారు 500 మంది పాల్గొన్నారు. ప్రజలకు ఆర్థిక సమ్మిళిత పథకాలపై అవగాహన కల్పించడంతోపాటు రీ-కేవైసీ, నామినేషన్ల నమోదు, క్లెయిమ్‌ చేయని బ్యాంకు డిపాజిట్లకు సంబంధించిన సేవలు అందించేందుకు వివిధ బ్యాంకులు ప్రత్యేక కౌంటర్లను ఏర్పాటు చేశాయి. సైబర్‌ మోసాల నివారణ, ఆన్‌లైన్‌ లావాదేవీల సమయంలో తీసుకోవాల్సిన జాగ్రత్తలపై కూడా అవగాహన కల్పించారు.
కార్యక్రమంలో ఇండియన్‌ ఓవర్సీస్‌ బ్యాంక్‌ సీజీఎం ఎస్‌. గోపాల్‌, యూనియన్‌ బ్యాంక్‌ ఆఫ్‌ ఇండియా డీజీఎం బైజ్‌నాథ్‌ సింగ్‌, టీజీబీ జీఎం కృష్ణశర్మ, ఎస్‌బీఐ సికింద్రాబాద్‌ పరిపాలనా కార్యాలయ డీజీఎం మదన్‌ స్వామినాథన్‌, వికారాబాద్‌ ఆర్‌బీఓ రీజినల్‌ మేనేజర్‌ మోహన్‌ నాయక్‌ ధనావత్‌, దబిల్‌గూడ సర్పంచ్‌ యాదమ్మ, ఉప సర్పంచ్‌ అర్చన పాల్గొన్నారు.
బ్యాంక్‌ ఆఫ్‌ ఇండియా, బ్యాంక్‌ ఆఫ్‌ మహారాష్ట్ర, బ్యాంక్‌ ఆఫ్‌ బరోడా, ఇండియన్‌ బ్యాంక్‌, సెంట్రల్‌ బ్యాంక్‌ ఆఫ్‌ ఇండియా, పంజాబ్‌ నేషనల్‌ బ్యాంక్‌, ఐసీఐసీఐ బ్యాంక్‌, హెచ్‌డీఎఫ్‌సీ బ్యాంకులకు చెందిన రాష్ట్ర స్థాయి అధికారులు కూడా హాజరయ్యారు. రంగారెడ్డి జిల్లా లీడ్‌ డిస్ట్రిక్ట్‌ మేనేజర్‌ సుశీల్‌కుమార్‌ కేపీ శిబిరాన్ని సమన్వయం చేశారు.
(రంగారెడ్డి - మేజర్ న్యూస్)
