బియ్యం అక్రమార్కులపై సీఐడీ ఉక్కుపాదం.. పలు జిల్లాల్లో దాడులు!
హైదరాబాద్: తెలంగాణ రాష్ట్రవ్యాప్తంగా ప్రభుత్వ బియ్యాన్ని పక్కదారి పట్టిస్తూ అక్రమాలకు పాల్పడుతున్న రైస్ మిల్లర్లపై నేర పరిశోధన విభాగం (సీఐడీ) ఉక్కుపాదం మోపింది. పేదలకు చేరాల్సిన ప్రభుత్వ బియ్యాన్ని అక్రమంగా కాజేసిన పలువురు రైస్ మిల్లర్లపై సీఐడీ అధికారులు కేసులు నమోదు చేశారు.
రాష్ట్రంలోని వివిధ జిల్లాల్లో ఒకేసారి రంగంలోకి దిగిన సీఐడీ బృందాలు నిజామాబాద్, నల్గొండ, కరీంనగర్, రంగారెడ్డి మరియు హైదరాబాద్ జిల్లాల్లో ఆకస్మిక దాడులు నిర్వహించాయి. ఈ తనిఖీల్లో అక్రమాలకు పాల్పడినట్లు ప్రాథమికంగా ఆధారాలు లభించడంతో పలువురు రైస్ మిల్లర్లను అధికారులు అదుపులోకి తీసుకున్నారు.
ప్రభుత్వ ధాన్యాన్ని మిల్లింగ్ చేసి ఇవ్వకుండా బకాయిలు పెట్టడం, పక్కదారి పట్టించి కాజేయడం వంటి అక్రమాలపై అందిన ఫిర్యాదుల మేరకు ఈ చర్యలు చేపట్టినట్లు సమాచారం. రైస్ మిల్లుల్లో రికార్డులను, నిల్వలను తనిఖీ చేస్తున్నామని, ఈ కుంభకోణంలో ప్రమేయం ఉన్న ప్రతి ఒక్కరిపై కఠిన చర్యలు తీసుకుంటామని సీఐడీ అధికారులు స్పష్టం చేశారు.
