భూ సమస్యలకు శాశ్వత పరిష్కారమే లక్ష్యం
కొండాపూర్ ; మండల పరిధిలోని చెర్ల గోపులారం గ్రామంలో శుక్రవారం భూ రీ సర్వేపై గ్రామసభ నిర్వహించనున్నట్లు తహసీల్దార్ అశోక్ తెలిపారు. ప్రభుత్వం ప్రతిష్టాత్మకంగా చేపట్టిన భూముల పునఃసర్వేలో భాగంగా రైతులకు అవగాహన కల్పించడంతో పాటు సర్వే విధానం, ప్రయోజనాలను వివరించనున్నట్లు పేర్కొన్నారు.
ఎలా నిర్వహిస్తారు.. ఏమిటి ప్రయోజనం?
రీ సర్వేలో భాగంగా పాత రెవెన్యూ రికార్డులు, సెత్వార్, గ్రామ పటాలు, ఎఫ్ఎంబీ, పట్టాదారు వివరాలను పరిశీలిస్తారు. ఆధునిక డీజీపీఎస్, ఎలక్ట్రానిక్ టోటల్ స్టేషన్ వంటి సర్వే సాంకేతిక పరికరాల సహాయంతో భూముల కొలతలు, భౌగోళిక హద్దులను గుర్తించి డిజిటల్ మ్యాపులు రూపొందిస్తారు. క్షేత్రస్థాయిలో రైతులు, సరిహద్దు భూయజమానుల సమక్షంలో హద్దులను నిర్ధారించి రికార్డులతో సరిపోల్చుతారు. గుర్తించిన వివరాలపై అభ్యంతరాలు ఉంటే నిబంధనల ప్రకారం పరిశీలిస్తారు.దీంతో భూమి విస్తీర్ణంలో తేడాలు, సరిహద్దు వివాదాలు, రికార్డుల్లో తప్పులు గుర్తించేందుకు అవకాశం ఉంటుంది. భూ వివరాలు డిజిటలైజేషన్ కావడంతో భవిష్యత్తులో భూముల క్రయవిక్రయాలు, వారసత్వ బదిలీలు, రుణాల పొందడంలోనూ పారదర్శకత పెరుగుతుంది. ఈ కార్యక్రమానికి జిల్లా అధికారులు హాజరుకానున్నట్లు తహసీల్దార్ తెలిపారు. గ్రామ ప్రజాప్రతినిధులు, రైతులు, గ్రామస్తులు గ్రామసభలో పాల్గొనాలని సూచించారు.