అర్హులందరూ ఓటు హక్కు నమోదు చేసుకోవాలి
తెలంగాణ బ్యూరో ప్రతినిధి: హైదరాబాద్‌–రంగారెడ్డి–మహబూబ్‌నగర్ పట్టభద్రుల ఎమ్మెల్సీ ఎన్నికలను దృష్టిలో ఉంచుకుని అర్హులైన పట్టభద్రుల ఓటరు నమోదు కార్యక్రమాన్ని విస్తృతంగా నిర్వహిస్తున్నట్లు రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ తెలిపారు. కంటోన్మెంట్ నియోజకవర్గంలోని టీచర్స్ కాలనీ పార్కు వద్ద ఎమ్మెల్యే శ్రీ గణేశ్ ఆధ్వర్యంలో నిర్వహించిన పట్టభద్రుల ఓటరు నమోదు కార్యక్రమంలో మంత్రి పొన్నం ప్రభాకర్, మంత్రి అజారుద్దీన్, ఎమ్మెల్యే శ్రీ గణేశ్, సికింద్రాబాద్ డీసీసీ అధ్యక్షుడు దీపక్ జాన్ పాల్గొన్నారు. ఈ కార్యక్రమానికి యువతీ యువకులు పెద్ద సంఖ్యలో తరలివచ్చి పట్టభద్రుల ఓటరు నమోదుపై ఆసక్తి చూపించారు. ఈ సందర్భంగా మంత్రి పొన్నం ప్రభాకర్ మాట్లాడుతూ.. రాబోయే పట్టభద్రుల ఎమ్మెల్సీ ఎన్నికల్లో ఓటు హక్కును వినియోగించుకోవాలంటే అర్హులైన పట్టభద్రులంతా ముందుగా తమ పేర్లను ఓటరు జాబితాలో నమోదు చేసుకోవాలని పిలుపునిచ్చారు. పట్టభద్రుల ఓటరు నమోదుకు నవంబర్ 6వ తేదీ వరకు అవకాశం ఉందని, అర్హులెవరూ ఈ అవకాశాన్ని కోల్పోవద్దని సూచించారు. రాష్ట్రవ్యాప్తంగా వివిధ ప్రాంతాల్లో ప్రత్యేక శిబిరాలు నిర్వహిస్తూ అర్హులైన పట్టభద్రులందరి పేర్లను ఓటరు జాబితాలో చేర్చేందుకు చర్యలు తీసుకుంటున్నామని తెలిపారు. హైదరాబాద్‌–రంగారెడ్డి–మహబూబ్‌నగర్ పట్టభద్రుల నియోజకవర్గానికి కాంగ్రెస్ పార్టీ అభ్యర్థిగా సామ రామ్మోహన్ రెడ్డిని ప్రకటించినట్లు మంత్రి పేర్కొన్నారు. పట్టభద్రుల సమస్యలపై గళమెత్తి, వారి హక్కుల కోసం పోరాడే సామర్థ్యం ఉన్న యువ నాయకుడిగా ఆయనను పార్టీ అభ్యర్థిగా ఎంపిక చేసినట్లు తెలిపారు.
నిరుద్యోగులు, ఉద్యోగులు, న్యాయవాదులు, వైద్యులు సహా వివిధ రంగాలకు చెందిన పట్టభద్రులు ఎదుర్కొంటున్న సమస్యల పరిష్కారానికి కాంగ్రెస్ పార్టీ కృషి చేస్తుందని పొన్నం ప్రభాకర్ వెల్లడించారు. పట్టభద్రుల సమస్యలను ప్రభుత్వాలు, ప్రజాప్రతినిధుల దృష్టికి తీసుకెళ్లడంలో ఎమ్మెల్సీ ఎన్నికలు కీలకమని పేర్కొన్నారు.
కాంగ్రెస్ అగ్రనేత రాహుల్ గాంధీ ఓటు హక్కు పరిరక్షణ కోసం చేస్తున్న పోరాటంలో భాగంగా ప్రతి పట్టభద్రుడు తన ఓటు హక్కును నమోదు చేసుకోవాలని మంత్రి పిలుపునిచ్చారు. ప్రజాస్వామ్యంలో ఓటు హక్కు అత్యంత కీలకమని, అర్హులైన ప్రతి ఒక్కరూ ఓటరు నమోదుపై బాధ్యతతో వ్యవహరించాలని కోరారు. కంటోన్మెంట్ ప్రాంతంలో నిర్వహించిన ఈ కార్యక్రమం ద్వారా పట్టభద్రుల ఓటరు నమోదుపై అవగాహన కల్పించడంతో పాటు, అర్హులైన యువతీ యువకులు తమ పేర్లను నమోదు చేసుకునేలా కాంగ్రెస్ నాయకులు చర్యలు చేపట్టారు.
