అంగరంగ వైభవం.. కే బీసీఏ దుర్గోత్సవం - ఘనంగా కే బీ సీ ఏ ఆధ్వర్యంలో దుర్గామాత వేడుకలు

హైదరాబాద్ సిటీ బ్యూరో, మేజర్ న్యూస్ : కొండాపూర్ బెంగాలీ కల్చరల్ అసోసియేషన్ (కే బీ సీ ఏ) ఆధ్వర్యంలో, రాధే గ్రూప్ సమర్పణలో అక్టోబర్ 16 నుంచి 21 వరకు మాధాపూర్‌లోని సిసిఆర్టీ ప్రాంగణంలో నిర్వహించిన కే బి సి ఏ దుర్గోత్సవ్ 2026 ఘనంగా ముగిసింది. ఆరు రోజుల పాటు జరిగిన ఈ వేడుకల్లో సుమారు 25,000 మంది భక్తులు, కుటుంబ సభ్యులు, సాంస్కృతిక అభిమానులు పాల్గొన్నారు. సంప్రదాయ దుర్గాపూజ, సంగీతం, నృత్యం, నాటక ప్రదర్శనలు, వివిధ సాంస్కృతిక కార్యక్రమాలతో ఈ ఉత్సవాలు ప్రత్యేక ఆకర్షణగా నిలిచాయి.
తొలిసారిగా నిర్వహించిన ఈ దుర్గోత్సవ్‌లో భక్తి, సంప్రదాయం, సాంస్కృతిక వారసత్వంతో పాటు సామాజిక ఐక్యతకు ప్రాధాన్యతనిచ్చారు. ఆరు రోజుల పాటు నిర్వహించిన పూజా కార్యక్రమాలకు భక్తులు పెద్ద సంఖ్యలో హాజరుకాగా, కళాకారులు, చిన్నారులు అందించిన ప్రదర్శనలు సందర్శకులను ఆకట్టుకున్నాయి.
ఈ సందర్భంగా కేబీసీఏ అధ్యక్షుడు అయాన్ దేవ్ బర్మన్ మాట్లాడుతూ, “మా మొదటి దుర్గోత్సవ్‌ను విజయవంతంగా ముగించడం కే బి సి ఏకుటుంబం మొత్తానికి ఎంతో గర్వకారణం. ఆరు రోజుల వేడుకల్లో సుమారు 25,000 మంది పాల్గొనడం మా ప్రయత్నాలకు లభించిన గొప్ప ప్రోత్సాహం. భక్తి, బెంగాలీ సంస్కృతి, సంప్రదాయాల ద్వారా ప్రజలందరినీ ఒకే వేదికపైకి తీసుకురావాలన్నదే మా ప్రధాన లక్ష్యం. ఈ కార్యక్రమానికి సమర్పకులుగా నిలిచిన రాధే గ్రూప్‌కు, మా సభ్యుల కుటుంబాలకు, వాలంటీర్లకు, కళాకారులకు, సహకరించిన ప్రతి ఒక్కరికీ, ఉత్సవాల్లో పాల్గొన్న సందర్శకులందరికీ మా హృదయపూర్వక కృతజ్ఞతలు” అని తెలిపారు.
అక్టోబర్ 20న నిర్వహించిన మహా నవమి వేడుకల్లో సంప్రదాయ నవమి పూజ, పవిత్ర హోమం ప్రధాన ఆకర్షణలుగా నిలిచాయి. సాయంత్రం నిర్వహించిన సాంస్కృతిక కార్యక్రమాల్లో రాజ్ అకాడమీ చిన్నారుల నృత్య ప్రదర్శనలు, దుర్బా మజుందార్ మరియు ఆమె బృందం ప్రదర్శించిన రవీంద్రనాథ్ ఠాగూర్ రచన ‘చిత్రాంగద’ నృత్య నాటకం ప్రేక్షకులను విశేషంగా ఆకట్టుకున్నాయి. వయోలిన్ సిస్టర్స్‌తో పాటు పలువురు కళాకారులు అందించిన సంగీత ప్రదర్శనలు వేడుకలకు మరింత శోభను తీసుకొచ్చాయి. వివిధ రాష్ట్రాలకు చెందిన కళాకారులు ఒకే వేదికపై ప్రదర్శనలు ఇవ్వడం ద్వారా కళలు, సంస్కృతులు ప్రాంతీయ సరిహద్దులను అధిగమిస్తాయని చాటిచెప్పారు.
కేబీసీఏ సభ్యులు మాట్లాడుతూ, తమ తొలి దుర్గోత్సవ్‌కు ప్రజల నుంచి లభించిన విశేష స్పందన పట్ల ఆనందం వ్యక్తం చేశారు. సుమారు 25,000 మంది పాల్గొనడం సంఘం నిర్వహించిన కార్యక్రమానికి లభించిన ఆదరణకు నిదర్శనమని పేర్కొన్నారు. ఈ వేడుకలను విజయవంతం చేయడంలో ఎగ్జిక్యూటివ్ కమిటీ సభ్యులు, వాలంటీర్లు, సభ్యుల కుటుంబాలు, కళాకారులు, స్పాన్సర్లు అందించిన సహకారం అభినందనీయమని తెలిపారు. రాధే గ్రూప్‌కు ప్రత్యేక కృతజ్ఞతలు తెలియజేస్తూ, భవిష్యత్తులోనూ బెంగాలీ సంస్కృతి, సంప్రదాయాలను ప్రోత్సహించే కార్యక్రమాలను మరింత విస్తృతంగా నిర్వహిస్తామని వెల్లడించారు.
సంప్రదాయ బెంగాలీ దుర్గాపూజ వైభవాన్ని ఆధునిక నిర్వహణ పద్ధతులతో మేళవించడం ఈ ఉత్సవాల ప్రత్యేకతగా నిలిచింది. భక్తులందరికీ ఉచితంగా మహాభోగ్ ప్రసాదం అందించడంతో పాటు, ప్రత్యేకంగా ఏర్పాటు చేసిన ఫుడ్, రిటైల్ స్టాళ్లు, వాలెట్ పార్కింగ్ సదుపాయం, విభిన్న సాంస్కృతిక కార్యక్రమాలను నిర్వహించారు. సందర్శకులకు సౌకర్యవంతమైన అనుభూతిని అందించడంపై నిర్వాహకులు ప్రత్యేక దృష్టి సారించారు.
రాధే గ్రూప్ సమర్పణలో నిర్వహించిన కేబీసీఏ దుర్గోత్సవ్ 2026కు సహకరించిన సమర్పకులు, ఇతర మద్దతుదారులకు నిర్వాహకులు కృతజ్ఞతలు తెలిపారు. బెంగాలీ సంస్కృతి, సంప్రదాయాలను ప్రోత్సహిస్తూ హైదరాబాద్‌లో విభిన్న సాంస్కృతిక నేపథ్యాల ప్రజలను ఒకే వేదికపైకి తీసుకురావడమే ఈ కార్యక్రమం ప్రధాన ఉద్దేశమని పేర్కొన్నారు.
ప్రముఖ సంస్థల్లో పనిచేసిన నిపుణుల ఆధ్వర్యంలో ఏర్పాటైన కే బి సి ఏ, తొలి సంవత్సరంలోనే 200కు పైగా కుటుంబాలను, 500 మందికి పైగా సభ్యులను ఒకే వేదికపైకి తీసుకొచ్చింది. బెంగాలీ సాంస్కృతిక వారసత్వాన్ని పరిరక్షించడం, వివిధ సంస్కృతుల మధ్య పరస్పర అవగాహనను పెంపొందించడం, సమాజంలో ఐక్యతను బలోపేతం చేయడం లక్ష్యంగా సంఘం పనిచేస్తోంది.
కేబీసీఏ 2026–29 కార్యవర్గంలో అధ్యక్షుడిగా అయాన్ దేవ్ బర్మన్, ఉపాధ్యక్షురాలిగా తనయా భట్టాచార్య, ప్రధాన కార్యదర్శిగా సుభదీప్ భట్టాచార్య, సంయుక్త కార్యదర్శిగా సుభజిత్ ఘోష్, కోశాధికారిగా శశాంక్ మిత్రా ఉన్నారు. కార్యవర్గ సభ్యులుగా అనిర్బన్ గోస్వామి, జె. శంకర్ పరదా, సౌరభ్ మైతి, బిశ్వజిత్ ఘోష్, శౌవిక్ ఎస్. మజుందార్ కొనసాగుతున్నారు.
దుర్గోత్సవ్ 2026 విజయవంతంగా ముగియడంతో స్పాన్సర్లు, కళాకారులు, వాలంటీర్లు, భక్తులు, సభ్యుల కుటుంబాలు, సందర్శకులందరికీ KBCA కృతజ్ఞతలు తెలిపింది. భవిష్యత్తులోనూ హైదరాబాద్‌లో సాంస్కృతిక కార్యక్రమాలను విస్తృతంగా నిర్వహిస్తూ, బెంగాలీ సంప్రదాయాలను భావితరాలకు అందించేందుకు కృషి చేస్తామని సంఘం ప్రతినిధులు తెలిపారు.