‘అలై బలై’ కార్యక్రమంలో పాల్గొన్న బీజేపీ రాష్ట్ర అధికార ప్రతినిధి డా. చికోటి ప్రవీణ్ కుమార్

హైదరాబాద్, మేజర్ న్యూస్:  నాంపల్లి ఎగ్జిబిషన్ గ్రౌండ్స్‌లో బండారు దత్తాత్రేయ ఆధ్వర్యంలో దసరా పండుగ అనంతరం అత్యంత వైభవంగా నిర్వహించిన సాంప్రదాయ ‘అలై బలై’ కార్యక్రమానికి బీజేపీ రాష్ట్ర అధికార ప్రతినిధి, ధర్మ రక్ష వ్యవస్థాపకులు డా. చికోటి ప్రవీణ్ కుమార్ విచ్చేశారు. ఈ సందర్భంగా ఆయన వివిధ రాజకీయ పార్టీలకు చెందిన ప్రముఖ నాయకులను, ప్రజాప్రతినిధులను మరియు విశిష్ట వ్యక్తులను మర్యాదపూర్వకంగా కలుసుకుని ఆత్మీయంగా ముచ్చటించారు. తెలంగాణ సంస్కృతి, సంప్రదాయాలు మరియు సోదరభావాన్ని చాటిచెప్పే ఈ వేడుకల్లో ఆయన ఉత్సాహంగా పాల్గొన్నారు. అనంతరం డా. చికోటి ప్రవీణ్ కుమార్ మాట్లాడుతూ.. "అలై బలై అనేది కేవలం ఒక వేడుక మాత్రమే కాదు; రాజకీయాలకు, ప్రాంతాలకు అతీతంగా స్నేహభావం, సామాజిక ఐక్యత మరియు తెలంగాణ ఆత్మగౌరవాన్ని ప్రతిబింబించే గొప్ప వేదిక. ఇటువంటి కార్యక్రమాలు సమాజంలో సామరస్యాన్ని పెంచుతాయి" అని పేర్కొన్నారు. ఈ కార్యక్రమంలో శ్రీ విజయ వినాయక స్వామి దేవాలయం (సైదాబాద్) చైర్మన్‌గా, ధర్మ రక్ష వ్యవస్థాపకుడిగా మరియు బీజేపీ రాష్ట్ర అధికార ప్రతినిధిగా పలువురు నేతలు ఆయనకు దసరా ఆత్మీయ శుభాకాంక్షలు తెలియజేశారు.