telanagana
వికారాబాద్ జిల్లాలో కలకలం: నవాబ్పేట్ మండలంలో లభ్యమైన ఏడు నెలల ఆడ శిశువు
నవాబు పేట్, మేజర్ న్యూస్ (సెప్టెంబర్ 30): వికారాబాద్ జిల్లా నవాబ్పేట్ మండల పరిధిలోని మాదిరెడ్డిపల్లి గ్రామ శివారులో గుర్తుతెలియని ఏడు నెలల ఆడ శిశువు సంచలన రీతిలో ప్రత్యక్షమవడం స్థానికంగా తీవ్ర కలకలం రేపింది. మంగళవారం సాయంత్రం వేళ గ్రామానికి చెందిన కుమ్మరి సావిత్రి భర్త అంజయ్య పొలం సమీపంలో ఈ చిన్నారిని స్థానికులు గమనించారు. ఎండకు ఎండుతూ, ఆకలితో అల్లాడుతున్న పసిపాపను చూసి చలించిపోయిన స్థానికులు వెంటనే అప్రమత్తమై పోలీసులకు సమాచారం అందించారు. ఈ ఘటనపై కేసు నమోదు చేసుకున్న పోలీసులు పసిపాప ఆచూకీ మరియు వివరాలపై విస్తృత స్థాయి విచారణను వేగవంతం చేశారు.స్థానికుల సమాచారం మేరకు సంఘటనా స్థలానికి చేరుకున్న పోలీసులు, పాపను భద్రంగా స్థానిక నవాబ్పేట్ పోలీస్ స్టేషన్కు తరలించారు. అనంతరం బుధవారం ఉదయం పది గంటల సమయంలో పూర్తి రక్షణ నడుమ శిశువును పోలీస్ స్టేషన్కు తీసుకువచ్చి ఉన్నతాధికారులకు అప్పగించారు. ఈ సమాచారం అందుకున్న వెంటనే నవాబ్పేట్ సబ్ ఇన్స్పెక్టర్ స్పందించి, పసిపాప రక్షణకు అత్యంత ప్రాధాన్యతనిచ్చారు. చిన్నారి ఆరోగ్యం, భద్రతను దృష్టిలో ఉంచుకొని తక్షణ చర్యల నిమిత్తం వికారాబాద్ జిల్లా చైల్డ్ వెల్ఫేర్ కమిటీ అధికారులకు అధికారికంగా సమాచారం అందించడం జరిగింది.ప్రస్తుతం చైల్డ్ వెల్ఫేర్ కమిటీ ఆధ్వర్యంలో శిశువుకు వైద్య పరీక్షలు నిర్వహించడంతో పాటు సురక్షిత ప్రాంతంలో ఆశ్రయం కల్పించే ఏర్పాట్లు జరుగుతున్నాయి. ఈ అభం శుభం తెలియని పసిపాపను ఇక్కడ వదిలి వెళ్లిన అనామకులు ఎవరనే కోణంలో పోలీసులు ఆరా తీస్తున్నారు. చుట్టుపక్కల గ్రామాలతో పాటు పరిసర ప్రాంతాల్లో గైర్హాజరైన గర్భిణులు లేదా శిశువుల వివరాలపై ఆశ కార్యకర్తలు మరియు అంగన్వాడీ సిబ్బంది ద్వారా పోలీసులు వివరాలు సేకరిస్తున్నారు. శిశువు తల్లిదండ్రులు లేదా సంరక్షకులు ఎవరైనా ఉంటే వెంటనే పోలీస్ స్టేషన్ను సంప్రదించాలని అధికారులు విజ్ఞప్తి చేశారు. త్వరలోనే పూర్తి వివరాలు సేకరించి చట్టపరమైన నిబంధనల ప్రకారం తదుపరి చర్యలు తీసుకోనున్నట్లు పోలీసులు స్పష్టం చేశారు.
రిపోర్టర్ ఎం.వెంకటేష్
