ఉమ్మడి మెదక్ జిల్లాలో మైనింగ్ అక్రమాలపై విచారణ జరపాలి.

అల్లాదుర్గ్ …అల్లాదుర్గం.. ఉమ్మడి మెదక్ జిల్లా లో విచ్చలవిడిగా  జరుగుతున్న మైనింగ్ మాఫియాపై ఉక్కు పాదం మోపాలని సింగూరు జలాల సాధన కమిటీ అధ్యక్షుడు బ్రహ్మం డిమాండ్ చేశారు. ప్రభుత్వ నిబంధనలను విస్మరించి, ప్రకృతికి సవాల్ విసిరుతున్న అక్రమార్కులపై ఉల్లంఘన పాల్పడుతున్న వారిపై కఠిన చర్యలు తీసుకోవాలని కోరారు. ప్రకృతి ఖనిజ సంపద కాపాడుతూ, పర్యావరణాన్ని పరిరక్షిస్తూ, ప్రజా ఆరోగ్యాన్ని కాపాడడం ప్రభుత్వ బాధ్యత అని పేర్కొన్నారు. సంగారెడ్డి, మెదక్, జిల్లాలోని వివిధ మండలాల్లో కొనసాగుతున్న క్రషర్లు, స్టోన్ క్రషర్లకు అనుమతులు ఉన్నాయా, గడువు ముగిసిందా, లేదా దానిపై సంబంధిత అధికారులు స్పష్టత ఇవ్వాల్సి ఉందని పేర్కొన్నారు.  ప్రతి యూనిట్కు లైసెన్సులు,  అధికారిక రికార్డులు క్షేత్రస్థాయిలో కఠినంగా అమలు చేయాలని డిమాండ్ చేశారు. అనుమతికి మించి ఖనిజాలు తవ్వడం వల్ల ప్రభుత్వ ఆదాయానికి గండి పడడమే కాకుండా పర్యావరణానికి ముప్పు వంటిల్లుతుందని, దట్టమైన దుమ్ము, శబ్దాలు, విపరీతంగా తిరుగుతున్న వాహనాలతో పరిసర ప్రాంతాల ప్రజలు ఇబ్బందులు పడుతున్నారని ఆవేదన వ్యక్తం చేశారు. ఇప్పటికి చాలాసార్లు దీనిపై ఫిర్యాదు చేయడం జరిగిందని కానీ కొందరు అవినీతి అధికారుల వల్ల మైనింగ్ మాఫియా ఆగడాలు సాగుతున్నాయని ఇప్పటికైనా ఉన్నతాధికారులు స్పందించి గతంలో జారీ చేసిన నోటీసులు, విధించిన జరిమానాలు, విచారణ జరిపి అక్రమ క్రషర్ మిషన్లపై ఉక్కు పాదం మోపాలని కోరారు.