చిన్నారి హత్య కేసు: కక్షతోనే దారుణం, నిందితుడి కోసం పోలీసుల తీవ్ర గాలింపు
హైదరాబాద్:సికింద్రాబాద్‌లోని బొల్లారం పోలీస్ స్టేషన్ పరిధిలోని ఒక అపార్ట్‌మెంట్‌లో చిన్నారి దారుణ హత్యకు గురైన ఘటనలో సంచలన విషయాలు వెలుగులోకి వచ్చాయి. బిల్డింగ్ అసోసియేషన్ వారు వారం రోజుల క్రితం ఉద్యోగం నుంచి తొలగించారన్న కక్షతోనే పూర్వ వాచ్‌మెన్ విక్రమ్ ఈ దారుణానికి ఒడిగట్టినట్లు పోలీసులు నిర్ధారించారు.
పోలీసులు తెలిపిన వివరాల ప్రకారం.. అపార్ట్‌మెంట్‌లో పనిచేస్తున్న విక్రమ్ ప్రవర్తన సరిగా లేకపోవడంతో అసోసియేషన్ సభ్యులు అతడిని ఉద్యోగం నుంచి తొలగించారు. దీంతో కక్ష పెంచుకున్న విక్రమ్, అపార్ట్‌మెంట్‌కు చెందిన చిన్నారిని కిడ్నాప్ చేసేందుకు స్కెచ్ వేశాడు. ప్లాన్ ప్రకారం చిన్నారిని క్లబ్‌హౌస్ వైపు తీసుకెళ్లాడు. మనవరాలు కనిపించకపోవడంతో అనుమానం వచ్చిన తాత క్లబ్‌హౌస్ పరిసరాల్లో చిన్నారి కోసం తీవ్రంగా వెతకడం ప్రారంభించారు.
అదే సమయంలో అపార్ట్‌మెంట్ వాసులు పోలీసులకు సమాచారం ఇవ్వడంతో, బయటకు తీసుకెళ్లే అవకాశం లేక నిందితుడు విక్రమ్ తీవ్ర భయాందోళనకు గురయ్యాడు. పోలీసులు ఎక్కడ పట్టుకుంటారోనన్న భయంతో చిన్నారిని అక్కడే దారుణంగా హత్య చేసి, మృతదేహాన్ని నీటి సంపులో పడేసి పరారయ్యాడు. ప్రస్తుతం నిందితుడు సికింద్రాబాద్ రైల్వేస్టేషన్ పరిసరాల్లో తిరుగుతున్నట్లు ఆధారాలు లభించడంతో, ప్రత్యేక బృందాలు రంగంలోకి దిగి అతని కోసం తీవ్రంగా గాలిస్తున్నాయి.
