ఈ నెల 19న ప్రాంతీయ స్థాయి డాక్ అదాలత్

హైదరాబాద్, మేజర్ న్యూస్ (అక్టోబర్ 11):

తపాలా సేవలకు సంబంధించిన ప్రజల ఫిర్యాదులు, సమస్యల పరిష్కారం కోసం ఈ నెల 19న ప్రాంతీయ స్థాయి డాక్ అదాలత్ నిర్వహించనున్నట్లు హైదరాబాద్ హెడ్‌క్వార్టర్స్ రీజియన్ పోస్ట్‌మాస్టర్ జనరల్ కార్యాలయం ఒక ప్రకటనలో తెలిపింది. ఉదయం 11 గంటలకు వర్చువల్ విధానంలో ఈ అదాలత్ నిర్వహించనున్నారు.హైదరాబాద్, రంగారెడ్డి, మేడ్చల్‌-మల్కాజిగిరి, సంగారెడ్డి, మెదక్, వికారాబాద్, సిద్దిపేట జిల్లాల ప్రజలు ఇండియా పోస్ట్ సేవలకు సంబంధించిన తమ ఫిర్యాదులను ఈ నెల 17వ తేదీలోగా పంపించాలని అధికారులు సూచించారు. ఫిర్యాదులను శ్రీ ఆర్. సత్యనారాయణ, అసిస్టెంట్ డైరెక్టర్ ఆఫ్ పోస్టల్ సర్వీసెస్-II, పోస్ట్‌మాస్టర్ జనరల్ కార్యాలయం, హెడ్‌క్వార్టర్స్ రీజియన్, జామా-ఇ-ఉస్మానియా పోస్ట్ ఆఫీస్ బిల్డింగ్, హైదరాబాద్-500007 చిరునామాకు పంపించాలి.ఫిర్యాదులను స్పష్టంగా రాయడంతోపాటు కవరు వెలుపల తప్పనిసరిగా ‘రీజినల్ లెవెల్ డాక్ అదాలత్’ అని పేర్కొనాలి. ఫిర్యాదుతోపాటు మొబైల్ నంబర్, ఈ-మెయిల్ ఐడీ, పూర్తి చిరునామాను పొందుపరచాలి. ఆన్‌లైన్ సమావేశంలో పాల్గొనేందుకు అవసరమైన లింక్‌ను ఫిర్యాదుదారుల మొబైల్ నంబర్ లేదా ఈ-మెయిల్‌కు పంపిస్తారు.సిబ్బందికి సంబంధించిన అంశాలు, సేవా విషయాలు, న్యాయస్థానాల్లో పెండింగ్‌లో ఉన్న కేసులకు సంబంధించిన ఫిర్యాదులను ఈ అదాలత్‌లో స్వీకరించబోమని అధికారులు స్పష్టం చేశారు. తపాలా సేవల్లో ఎదురవుతున్న సమస్యల పరిష్కారం కోసం ప్రజలు ఈ అవకాశాన్ని వినియోగించుకోవాలని సూచించారు.