ట్రాక్టర్ డోజర్ స్వాధీనానికి వెళ్లిన అటవీ అధికారులు…అడ్డుకున్న గిరిజనులు...

--- పురుగుల మందు తాగి మహిళ ఆత్మహత్యాయత్నం.
---పల్లె బోగడ తండాలో లోఉద్రిక్తత.
--  ట్రాక్టర్ డోజర్ ను వదిలి వెనుదిరిగిన అధికారులు.

సూర్య, నాగిరెడ్డిపేట:అటవీ భూమిని చదును చేశారనే ఆరోపణల నేపథ్యంలో అటవీ భూమిని చదును చేసిన ట్రాక్టర్ డోజర్ ను స్వాధీనం చేసుకునేందుకు వెళ్లిన అటవీశాఖ అధికారులను గిరిజనులు అడ్డుకోవడంతో నాగిరెడ్డిపేట మండలం పల్లెబోగడ తండాలో  శుక్రవారం సాయంత్రం ఉద్రిక్తత చోటు చేసుకుంది. ట్రాక్టర్ డోజర్ ను  తీసుకెళ్లేందుకు అధికారులు ప్రయత్నించగా తండావాసులు డోజర్ ముందు  బైఠాయించారు. దీంతో అటవీశాఖ అధికారులు, గిరిజనుల మధ్య వాగ్వాదం చోటుచేసుకుంది. ఈ క్రమంలో ట్రాక్టర్ డోజర్ కు సంబంధించిన కుటుంబీకురాలు ధనావత్ సంత్యాలి  పురుగుల మందు తాగి ఆత్మహత్యాయత్నానికి పాల్పడటంతో పరిస్థితి మరింత ఉద్రిక్తంగా మారింది.అటవీ శాఖ అధికారుల సమాచారం ప్రకారం.. బొల్లారం రేంజ్ పరిధిలోని పల్లె బోగడ తండా శివారులో కొందరు వ్యక్తులు ఇటీవల సుమారు 14 ఎకరాల అటవీ భూమిని  చదును చేశారు. దీంతో విశ్వసనీయ సమాచారం మేరకు ఎల్లారెడ్డి అటవీశాఖ రేంజ్ అధికారి రమేష్ ఆధ్వర్యంలో అటవీ శాఖ అధికారులు, పోలీసుల సహాయంతో పల్లెబోగడ తండాకు చేరుకున్నారు. అటవీశాఖ అధికారులు గుర్తించిన ట్రాక్టర్ డోజర్ ను స్వాధీనం చేసుకునే ప్రయత్నం చేయగా, ట్రాక్టర్ డోజర్ యజమానులు తాము తమ ట్రాక్టర్ డోజర్ తో అటవీ భూమిని చదును చేయలేదంటూ ట్రాక్టర్ డోజర్ కుటుంబీకులు తండా వాసులతో కలిసి‌ ట్రాక్టర్ డోజర్ ముందు బైఠాయించి దానిని తరలించకుండా అడ్డుకున్నారు.

గతంలో ఇతర ట్రాక్టర్లతో భూమిని చదును చేస్తే, ఇప్పుడు తమ ట్రాక్టర్ డోజర్ ఎలా తీసుకెళ్తారని వారు అధికారులను ప్రశ్నించారు. ఈ క్రమంలో ట్రాక్టర్ డోజర్ కు సంబంధించిన కుటుంబీకురాలు ధనావత్ సంత్యాలి మనస్తాపానికి గురై పురుగుల మందు తాగినట్లు స్థానికులు తెలిపారు. అపస్మారక స్థితికి చేరుకున్న ఆమెను తండావాసులు చికిత్స నిమిత్తం ఎల్లారెడ్డి ఆసుపత్రికి తరలించారు. దీంతో పరిస్థితి ఉద్రిక్తంగా మారడంతో  ట్రాక్టర్ డోజర్ ను స్వాధీనం చేసుకోకుండా అటవీశాఖ అధికారులు వెనుదిరిగారు.