దుర్గమ్మ ఆశీస్సులతో ప్రజలంతా సుఖసంతోషాలతో ఉండాలి
- మంత్రి నారా లోకేష్
దుర్గాదేవి మండపాలకు ఉచిత విద్యుత్ అందిస్తున్న కూటమి ప్రభుత్వం
సూర్య స్టేట్ బ్యూరో అమరావతి : కనకదుర్గమ్మ ఆశీస్సులతో రాష్ట్ర ప్రజలందరూ ఆయురారోగ్యాలతో, సుఖసంతోషాలతో జీవించాలని విద్య, ఐటీ శాఖల మంత్రి నారా లోకేష్ ఆకాంక్షించారు. శరన్నవరాత్రి ఉత్సవాల సందర్భంగా రాష్ట్ర ప్రజలకు ఆయన శుభాకాంక్షలు తెలిపారు. కృష్ణా నదీ తీరాన ఇంద్రకీలాద్రి శరన్నవరాత్రి ఉత్సవాల శోభతో అలరారుతోందని పేర్కొన్నారు. భక్తులను ఎల్లవేళలా కాపాడే బెజవాడ కనకదుర్గమ్మ తొమ్మిది రోజుల పాటు తొమ్మిది అలంకారాల్లో భక్తులకు దర్శనమిస్తారని తెలిపారు. రాష్ట్రవ్యాప్తంగా శరన్నవరాత్రి ఉత్సవాలు నిర్వహిస్తున్న దుర్గాదేవి మండపాలకు ఉచిత విద్యుత్ అందించాలని కూటమి ప్రభుత్వం నిర్ణయం తీసుకుందని లోకేష్ పేర్కొన్నారు. దుర్గమ్మ కరుణాకటాక్షాలు రాష్ట్ర ప్రజలందరిపై ఉండాలని, ప్రతి కుటుంబం సుఖశాంతులు, ఆయురారోగ్యాలతో వర్ధిల్లాలని ఆకాంక్షించారు.
