రైతులు దళారులను నమ్మి మోసపోవద్దు- సర్పంచ్ కావటి సుధాకర్

తరిగొప్పుల, మేజర్ న్యూస్, రైతులు దళారుల చేతిలో మోసపోకుండా, తాము పండించిన వరి ధాన్యాన్ని ప్రభుత్వం ఏర్పాటు చేసిన కొనుగోలు కేంద్రాల్లోనే విక్రయించి మద్దతు ధర పొందాలని అబ్దుల్ నాగారం గ్రామ సర్పంచ్ కావటి సుధాకర్ పిలుపునిచ్చారు.  మండల పరిధిలోని అబ్దుల్ నాగారం గ్రామంలో గల రైతు వేదికలో మహిళా సంఘాల ఆధ్వర్యంలో ఏర్పాటు చేసిన వరి ధాన్యం కొనుగోలు కేంద్రాన్ని ఆయన అధికారికంగా ప్రారంభించారు.ఈ సందర్భంగా సర్పంచ్ మాట్లాడుతూ రైతులు తమ ధాన్యాన్ని బాగా ఆరబెట్టుకుని, ఎలాంటి తాలు, చెత్త లేకుండా నిబంధనల ప్రకారం కొనుగోలు కేంద్రాలకు తీసుకురావాలని సూచించారు.  ఏ-గ్రేడ్ రకం ధాన్యానికి ప్రభుత్వం నిర్ణయించిన పూర్తి మద్దతు ధర రూ. 2461 లభిస్తుందని ఆయన తెలిపారు. దీనితో పాటు ప్రభుత్వం సన్న వరి రకాలకు అందించే రూ. 500 బోనస్ కూడా రైతులకు అందుతుందని స్పష్టం చేశారు. రైతులంతా ఈ అవకాశాన్ని సద్వినియోగం చేసుకోవాలని కోరారు. కార్యక్రమంలో ఉప సర్పంచ్ నీల సంపత్, ఏఈఓ వినయ్ కుమార్, వార్డు సభ్యులు నీల కనకరాజు, మహిళా సంఘం అధ్యక్షురాలు పెండ్లి రాధ, అర్జుల లక్ష్మి, సీఏ బాలయ్య, శ్రీవిద్య, కాంగ్రెస్ పార్టీ గ్రామ శాఖ అధ్యక్షుడు బాలగోని శ్రీనివాస్ మరియు స్థానిక రైతులు తదితరులు పాల్గొన్నారు.

రిపోర్టర్; కుమార్, తరిగొప్పుల, జనగామ జిల్లా