రహత్‌నగర్‌లో సర్వే నంబర్‌ 80 భూమిపై గ్రామస్తుల స్పష్టీకరణ

సూర్య,భీమ్‌గల్ :భీమ్‌గల్ మండలం రహత్‌నగర్ గ్రామంలోని సర్వే నంబర్‌ 80 భూమి విషయంలో సోషల్ మీడియాలో వైరల్ అవుతున్న వీడియోపై గ్రామస్తులు తీవ్ర అభ్యంతరం వ్యక్తం చేశారు. ఈ భూమి ఏ ఒక్క రాజకీయ పార్టీకి సంబంధించింది కాదని, గ్రామానికి సంబంధించిన ఆస్తి కావడంతో గ్రామస్తులంతా కలిసి చర్చించి స్పష్టతనిస్తున్నట్లు తెలిపారు. ఈ మేరకు ఆదివారం గ్రామంలో అన్ని పార్టీల నాయకులు, గ్రామ పెద్దలు మీడియా సమావేశం నిర్వహించారు.ఈ సందర్భంగా గ్రామస్తులు మాట్లాడుతూ.. గతంలో పటేల్‌–పట్వారీ వ్యవస్థ ఉన్న సమయంలో భూములకు శిస్తు, పన్నులు చెల్లించి పట్టాలు పొందినట్లు వివరించారు. అప్పట్లో తమ వద్ద పనిచేసిన వడ్ల, కుమ్మరి, సుంకరి వర్గాలకు కొన్ని భూములు కేటాయించారని, సుంకరి కుటుంబానికి 10 ఎకరాల 26 గుంటల భూమి ఇనాంగా ఇచ్చినట్లు పేర్కొన్నారు. కాలక్రమంలో ఆ కుటుంబం కనుమరుగవడంతో సదరు భూమిని ప్రభుత్వం స్వాధీనం చేసుకుందని తెలిపారు. భూమి ఆక్రమణకు ప్రయత్నాలు జరగడంతో గ్రామస్తులంతా కలిసి దానిని ప్రభుత్వానికి అప్పగించినట్లు వెల్లడించారు.గత వారం రోజులుగా ఈ భూమికి సంబంధించిన ఘటన సోషల్ మీడియాలో వైరల్ అవుతోందని, రెవెన్యూ శాఖ ఆర్‌ఐ అధికారిణి గ్రామానికి వచ్చి సర్వే నంబర్‌ 80లో అక్రమంగా ఏర్పాటు చేసిన మోటారును తొలగించే ప్రయత్నం చేసిన సమయంలో పోలీసులు శాంతిభద్రతలను కాపాడేందుకు తమ విధులు నిర్వర్తించారని తెలిపారు. అయితే పోలీసులు ఎస్‌ఐ తిరుపతి, మహేష్ కుమార్ గౌడ్‌తో పాటు కాంగ్రెస్ నాయకులకు సహకరిస్తున్నారంటూ వీడియోలో ప్రచారం చేయడాన్ని తీవ్రంగా ఖండించారు.

మహేష్ కుమార్ గౌడ్ వివాదాలకు దూరంగా ఉండే వ్యక్తిగా పేరొందారని, ఆయనపై రాజకీయ రంగు పులుముతూ ఆరోపణలు చేయడం సరికాదని గ్రామస్తులు పేర్కొన్నారు. గ్రామంలో జరిగిన విషయాలను గ్రామస్తులంతా కలిసి చర్చించుకున్నామని, వాస్తవాలు తెలుసుకోకుండా తప్పుడు ప్రచారం చేయవద్దని సూచించారు. సోషల్ మీడియాలో వైరల్ అవుతున్న వీడియోలను ప్రచారం చేయడం నిలిపివేయాలని, లేనిపక్షంలో బాధ్యులపై చట్టపరమైన చర్యలు తీసుకునేందుకు ముందుకు వస్తామని హెచ్చరించారు.ఈ సమావేశంలో గ్రామ సర్పంచ్ లకావత్ తిరుపతి, ఉపసర్పంచ్ భూక్య సేవలాల్, మాజీ జడ్పీటీసీ బాధావత్ శర్మ నాయక్, మాజీ సర్పంచ్ రాజ్ నాయక్, మాజీ ఎంపీటీసీ వినుకొండ ధర్మపురి, దాసరి నర్సయ్య, జరుపుల రాములు, భూక్య షబిలాల్, బాణావత్ శ్రీనివాస్, భూక్య నర్సింగ్ నాయక్, కొండపల్లి రాజు, చెరుకు రాజు, బాధావత్ బాలు, మాలవత్ లింబాద్రి, దొంతుల మధు, కొండపల్లి అజయ్ తదితర గ్రామ పెద్దలు, అన్ని పార్టీల నాయకులు, గ్రామస్తులు పాల్గొన్నారు.