బీసీలకు వెన్నుపోటు పొడిచింది గొడ్డలి పార్టీయే

నేటి దినపత్రిక సూర్య బ్యూరో రాజమహేంద్రవరం

స్థానిక సంస్థల్లో బీసీ రిజర్వేషన్ల విషయంలో వైసీపీ నాయకులు చేస్తున్న విమర్శలను టీడీపీ జాతీయ ఉపాధ్యక్షుడు, శాసన మండలి మాజీ డిప్యూటీ చైర్మన్ రెడ్డి సుబ్రహ్మణ్యం తీవ్రంగా ఖండించారు. రాజమహేంద్రవరంలో మీడియాతో మాట్లాడుతూ, బీసీలకు రాజకీయ గుర్తింపు, రిజర్వేషన్లు కల్పించిన చరిత్ర తెలుగుదేశం పార్టీకే ఉందని పేర్కొన్నారు. బీసీలకు అన్యాయం చేసిన వారే ఇప్పుడు నీతులు చెబుతూ, ప్రాంతాలవారీగా సమావేశాలు పెట్టి విమర్శలు చేయడం విడ్డూరంగా ఉందని మండిపడ్డారు.

*టీడీపీ హయాంలోనే బీసీలకు రాజకీయ గుర్తింపు*

1987లో అప్పటి ముఖ్యమంత్రి ఎన్టీ రామారావు నాయకత్వంలో స్థానిక సంస్థల్లో బీసీలకు 20 శాతం రిజర్వేషన్లు కల్పించారని, 1995లో వాటిని 34 శాతానికి పెంచిన ఘనత తెలుగుదేశం పార్టీకే దక్కుతుందని రెడ్డి సుబ్రహ్మణ్యం వివరించారు. అయితే, ఆ తర్వాత అధికారంలోకి వచ్చిన వైసీపీ ప్రభుత్వం బీసీ రిజర్వేషన్లను 24 శాతానికి తగ్గించిందని ఆయన ఆరోపించారు. బీసీలకు 34 శాతం రిజర్వేషన్లు కొనసాగించేందుకు న్యాయపోరాటం చేయడంలో గత ప్రభుత్వం విఫలమైందని విమర్శించారు.

*రాజమహేంద్రవరం, సమావేశాలు పెట్టి విమర్శలా?*

బీసీలకు తాము ఏం చేశామో చెప్పుకోలేని వైసీపీ నాయకులు రాజమహేంద్రవరంలో సమావేశాలు నిర్వహిస్తూ విమర్శలు చేయడం ఏమిటని రెడ్డి సుబ్రహ్మణ్యం ప్రశ్నించారు.ఐదు రీజియన్లలోనూ సమావేశాలు పెట్టడానికి సిద్ధమై విమర్శలు చేస్తూ తిరగడం కాదని, బీసీలకు గతంలో ఏం చేశారో ప్రజలకు వివరించాలని సవాల్ విసిరారు. “బీసీలకు మీరు ఏం చేశారు? మేము ఏం చేశాము? చర్చకు రండి.. మేము సిద్ధంగా ఉన్నాం” అంటూ సవాల్ చేశారు.

వైసీపీ నాయకుల విమర్శలను ఉద్దేశిస్తూ, “బీసీలకు ఏం చేయకుండా ఇప్పుడు గ్రామసింహాల్లా బౌ.. బౌ.. మని మొరుగుతున్నారు” అంటూ ఘాటుగా వ్యాఖ్యానించారు. ప్రజలకు వాస్తవాలు తెలుసునని, రాజకీయ విమర్శలతో బీసీలను తప్పుదోవ పట్టించలేరని అన్నారు.

*50 శాతం పరిమితి నేపథ్యంలో న్యాయపోరాటం*

స్థానిక సంస్థల్లో రిజర్వేషన్లపై సుప్రీంకోర్టు నిర్దేశించిన 50 శాతం పరిమితి కీలకమని పేర్కొన్న రెడ్డి సుబ్రహ్మణ్యం, బీసీలకు సాధ్యమైనంత న్యాయం చేయాలన్నదే కూటమి ప్రభుత్వ లక్ష్యమని చెప్పారు. బీసీలకు మెరుగైన రాజకీయ ప్రాతినిధ్యం కల్పించేందుకు ప్రభుత్వం న్యాయపరమైన మార్గాలను పరిశీలిస్తోందని తెలిపారు. స్థానిక సంస్థలకు సకాలంలో ఎన్నికలు నిర్వహించడం ద్వారా గ్రామాలు, పట్టణాల అభివృద్ధికి అవసరమైన నిధులు పొందడం కూడా ముఖ్యమని పేర్కొన్నారు.

బీసీలకు ఇచ్చిన హామీలను నెరవేర్చేందుకు కూటమి ప్రభుత్వం కట్టుబడి ఉందని, బీసీ రక్షణ చట్టం తీసుకురావడంతో పాటు ఆదరణ పథకాన్ని అమలు చేయడానికి చర్యలు తీసుకుంటామని తెలిపారు. గీత కార్మికులకు మద్యం దుకాణాలు, బార్లలో 10 శాతం రిజర్వేషన్, లైసెన్స్ ఫీజులో 50 శాతం రాయితీ కల్పించాలన్న ప్రభుత్వ హామీలను కూడా ప్రస్తావించారు. చెట్టుపై నుంచి పడి మరణించే గీత కార్మికుల కుటుంబాలకు రూ.10 లక్షల ఎక్స్‌గ్రేషియా అందించే అంశాన్ని వివరించారు.

*బీసీలకు ఏం చేశారో చర్చకు రండి*

బీసీ నాయకులు మహాత్మా జ్యోతిరావు పూలే, సర్దార్ గౌతు లచ్చన్న, దొమ్మేటి వెంకటరెడ్డి, కవయిత్రి మొల్లమ్మ వంటి ప్రముఖులను గౌరవించే కార్యక్రమాలను ప్రభుత్వం అధికారికంగా నిర్వహించేందుకు చర్యలు తీసుకుంటోందని రెడ్డి సుబ్రహ్మణ్యం తెలిపారు.బీసీల సంక్షేమం, రాజకీయ ప్రాతినిధ్యం విషయంలో ఎవరు ఏం చేశారో బహిరంగ చర్చకు రావాలని వైసీపీ నాయకులకు ఆయన సవాల్ విసిరారు. విమర్శలు చేయడం సులభమని, కానీ బీసీలకు చేసిన మేలు, జరిగిన నష్టం గురించి వాస్తవాలతో మాట్లాడాలని హితవు పలికారు.