పుతిన్‌తో ట్రంప్ చమురు ఒప్పందం.. సంచలన నివేదిక వెల్లడి!
సూర్య అంతర్జాతీయ & రక్షణ డెస్క్: రష్యా అధ్యక్షుడు వ్లాదిమిర్ పుతిన్‌తో అమెరికా అధ్యక్షుడు డొనాల్డ్ ట్రంప్ డీజిల్ మరియు చమురు సరఫరా ఒప్పందం కుదుర్చుకోవడం వెనుక సంచలన కారణాలు వెలుగులోకి వచ్చాయి. రష్యన్ చమురు శుద్ధి కర్మాగారాలపై (ఆయిల్ రిఫైనరీలపై) డ్రోన్ దాడులు నిలిపివేయాలని అమెరికా అధికారులు దాదాపు ఆరుసార్లు విజ్ఞప్తి చేసినప్పటికీ, ఉక్రెయిన్ అధ్యక్షుడు వొలోదిమిర్ జెలెన్‌స్కీ వాటిని పూర్తిగా పట్టించుకోలేదని (బేఖాతరు చేశారని) అంతర్జాతీయ మీడియా సంస్థ 'ఆక్సియోస్' (Axios) కథనం వెల్లడించింది.
ఒక ఉన్నత స్థాయి యూఎస్ అధికారిని ఉటంకిస్తూ వచ్చిన వివరాల ప్రకారం.. రష్యాలోని రిఫైనరీలపై ఉక్రెయిన్ నిరంతరం దాడులు చేయడం వల్ల అధ్యక్షుడు ట్రంప్‌తో ఉన్న సత్సంబంధాలు (గుడ్‌విల్) దెబ్బతిన్నాయని అమెరికా వర్గాలు వ్యాఖ్యానించాయి. ఉక్రెయిన్ వరుస దాడుల కారణంగా రష్యాలో తీవ్ర ఇంధన కొరత ఏర్పడటమే కాకుండా, అంతర్జాతీయంగా డీజిల్ కొరత, ధరల పెరుగుదల సమస్యలు తలెత్తాయని పేర్కొన్నారు.
కీవ్ వైఖరిపై తీవ్ర అసంతృప్తి చెందిన వాషింగ్టన్, అమెరికా మార్కెట్లో ఇంధన ధరల నియంత్రణ నెపంతో మాస్కోతో సంప్రదింపులు జరిపి డీజిల్ ఆంక్షల సడలింపునకు గ్రీన్ సిగ్నల్ ఇచ్చినట్లు నివేదిక స్పష్టం చేసింది. మరోవైపు, ట్రంప్-పుతిన్ ఒప్పందాన్ని జెలెన్‌స్కీ తీవ్రంగా తప్పుపడుతూ.. ఇది పుతిన్ యుద్ధ యంత్రాంగానికి సహాయం చేయడమేనని, యుద్ధాన్ని పొడిగించేందుకు దోహదపడే అత్యంత బలహీనమైన నిర్ణయమని మండిపడ్డారు. ఈ పరిణామంతో అమెరికా-ఉక్రెయిన్ దౌత్య సంబంధాలలో మరింత అగాధం పెరిగినట్లయింది.
