శ్రీ ఉజ్జయిని మహంకాళి అమ్మవారిని దర్శించుకున్న ఎంపీ అనిల్ కుమార్ యాదవ్
సికింద్రాబాద్ మేజర్ న్యూస్ : లష్కర్‌లోని చారిత్రాత్మక శ్రీ ఉజ్జయిని మహంకాళి దేవస్థానంలో జరుగుతున్న శరన్నవరాత్రి ఉత్సవాలు భక్తిశ్రద్ధలతో కొనసాగుతున్నాయి. ఉత్సవాల్లో భాగంగా దుర్గాష్టమి పర్వదినాన్ని పురస్కరించుకుని రాజ్యసభ సభ్యులు మందాడి అనిల్ కుమార్ యాదవ్ ఆదివారం అమ్మవారిని దర్శించుకుని ప్రత్యేక పూజలు నిర్వహించారు.
ఈ సందర్భంగా ఆలయ ట్రస్ట్ బోర్డు సభ్యులు, డీసీసీ సెక్రటరీ గుండెల్లి దేవి వరప్రసాద్, భాస్కర్ గుప్తా, శ్రీకాంత్ చారి, రఘు యాదవ్, ప్రేమ్ సాగర్, కాంగ్రెస్ నాయకులు మల్లికార్జున్‌తో పాటు పలువురు సీనియర్ కాంగ్రెస్ నాయకులు ఆయనకు స్వాగతం పలికారు. అనంతరం అమ్మవారి దర్శనం కల్పించి, శాలువాతో ఘనంగా సన్మానించి, తీర్థప్రసాదాలను అందజేశారు.
ఈ సందర్భంగా అనిల్ కుమార్ యాదవ్ మాట్లాడుతూ, శ్రీ ఉజ్జయిని మహంకాళి అమ్మవారి కృపాకటాక్షాలతో తెలంగాణ ప్రజలందరూ ఎల్లప్పుడూ సుఖసంతోషాలతో, ఆయురారోగ్యాలతో వర్ధిల్లాలని ఆకాంక్షించారు. రాష్ట్ర ప్రజలపై అమ్మవారి ఆశీస్సులు ఎల్లవేళలా ఉండాలని ప్రార్థించినట్లు తెలిపారు.
