సింగరేణి హైస్కూల్ మైదానం, ఇల్లందు క్లబ్‌లో ఘనంగా సద్దుల బతుకమ్మ వేడుకలు
• ఆటపాటలతో సందడిగా మారిన ప్రాంగణాలు.. • ఉత్సాహంగా పాల్గొన్న మహిళలు
సూర్య, మందమర్రి : తెలంగాణ సంస్కృతి, సంప్రదాయాలకు ప్రతీకగా నిలిచే సద్దుల బతుకమ్మ వేడుకలు మందమర్రి సింగరేణి హైస్కూల్ మైదానం, ఇల్లందు క్లబ్‌లో ఘనంగా నిర్వహించారు. సింగరేణి ఏరియా జనరల్ మేనేజర్ ఎన్. రాధాకృష్ణ, సేవా సమితి అధ్యక్షురాలు ఎన్. శ్రీవాణి రాధాకృష్ణ ముఖ్య అతిథులుగా హాజరై వేడుకలను ప్రారంభించారు. వివిధ రకాల రంగురంగుల పూలతో అందంగా పేర్చిన బతుకమ్మలతో ప్రాంగణాలు కళకళలాడాయి. పెద్ద సంఖ్యలో మహిళలు, ఉద్యోగుల కుటుంబ సభ్యులు పాల్గొని బతుకమ్మ పాటలు పాడుతూ, కోలాటాలు ఆడుతూ సందడి చేశారు. ఆటపాటలతో వేడుకలు పండుగ శోభను సంతరించుకున్నాయి. ఈ సందర్భంగా జీఎం ఎన్. రాధాకృష్ణ మాట్లాడుతూ.. సద్దుల బతుకమ్మ తెలంగాణ సంస్కృతి, సంప్రదాయాలకు ప్రతీక అని పేర్కొన్నారు. ప్రకృతిని, పూలను, మహిళా శక్తిని ఆరాధించే విశిష్టమైన పండుగగా బతుకమ్మకు ప్రత్యేక గుర్తింపు ఉందన్నారు. సింగరేణి కుటుంబాలన్నీ ఒకచోట చేరి ఐక్యతతో వేడుకలు జరుపుకోవడం ఆనందంగా ఉందని తెలిపారు. ఈ పండుగ ప్రతి ఒక్కరి జీవితాల్లో సంతోషాన్ని నింపాలని, సింగరేణి సంస్థ మరింత అభివృద్ధి సాధించాలని ఆకాంక్షించారు. వేడుకల్లో భాగంగా అందంగా బతుకమ్మలను పేర్చిన మహిళలను ప్రోత్సహించేందుకు ప్రత్యేక పోటీలు నిర్వహించారు. పోటీల్లో ప్రతిభ కనబరిచిన విజేతలకు మొదటి, రెండో, మూడో బహుమతులతోపాటు మరో ఐదుగురికి కన్సోలేషన్ బహుమతులను ముఖ్య అతిథుల చేతుల మీదుగా అందజేశారు. ఈ కార్యక్రమంలో ఎస్‌వో టు జీఎం జి.ఎల్. ప్రసాద్, ఏఐటీయూసీ వైస్‌ ప్రెసిడెంట్ సుదర్శన్, సీఓఎంఏఐ అధ్యక్షుడు రమేష్, డీజీఎం (పర్సనల్) సీహెచ్. అశోక్, ఏరియా సెక్యూరిటీ ఆఫీసర్ వెంకటేశ్వర్ రెడ్డి, సింగరేణి అధికారులు, కార్మిక సంఘాల నాయకులు, మహిళలు, ఉద్యోగుల కుటుంబ సభ్యులు పాల్గొన్నారు.
