మెటా అల్గారిథమ్స్‌పై కేంద్రం కీలక ఆదేశాలు: తప్పుదోవ పట్టించే కంటెంట్, శాంతిభద్రతల సమస్యలపై అడ్వైజరీ.. ఫేస్‌బుక్, ఇన్‌స్టాగ్రామ్‌లకు మార్గదర్శకాలు!
సూర్య టెక్నాలజీ & నేషనల్ డెస్క్, న్యూఢిల్లీ: సోషల్ మీడియా దిగ్గజం 'మెటా' ఆధ్వర్యంలోని ఫేస్‌బుక్, ఇన్‌స్టాగ్రామ్‌ ప్లాట్‌ఫామ్‌లలో కంటెంట్ సిఫార్సు వ్యవస్థలు పనిచేసే తీరుపై కేంద్ర ఎలక్ట్రానిక్స్ మరియు ఇన్ఫర్మేషన్ టెక్నాలజీ మంత్రిత్వ శాఖ తీవ్ర ఆందోళన వ్యక్తం చేసింది. శాంతిభద్రతలకు విఘాతం కలిగించేలా ఉన్న తప్పుదోవ పట్టించే సమాచారం, మార్ఫింగ్ చేసిన విజువల్స్ పదేపదే యూజర్లకు చేరకుండా తమ అల్గారిథమ్స్‌ను తక్షణమే సమగ్రంగా సమీక్షించాలని మెటాకు కేంద్ర ప్రభుత్వం స్పష్టమైన ఆదేశాలు జారీ చేసింది.
శాంతిభద్రతల సమస్యలు – ఆందోళన కలిగించే అంశాలు:
కొనసాగుతున్న సున్నితమైన ప్రజా సంఘటనలు, శాంతిభద్రతల పరిస్థితులపై సందర్భం లేని లేదా పాత వీడియోలు, ఫొటోలను ప్రస్తుత ఘటనలుగా ప్రచారం చేయడంపై మంత్రిత్వ శాఖ అభ్యంతరం వ్యక్తం చేసింది. పోలీసు చర్యలు, అత్యవసర ఆంక్షలపై అసత్య ప్రచారాలు చేయడం మరియు హింసను ప్రేరేపించే కంటెంట్‌ను అల్గారిథమ్స్ అనవసరంగా ఎక్కువ మందికి ప్రమోట్ చేస్తుండటంపై కేంద్రం హెచ్చరించింది. ప్రామాణికత నిర్ధారణ కాని విజువల్స్‌కు సరైన వివరణ/సందర్భాన్నిజోడించే పటిష్ట వ్యవస్థలను ఏర్పాటు చేయాలని స్పష్టం చేసింది.
మెటాకు 6 కీలక నిబంధనలు – ఐటీ చట్టాల అమలు:
నిషేధిత కంటెంట్‌ను గుర్తించి తొలగించడం, నిర్దిష్ట వర్గాల కథనాలనే పదేపదే యూజర్లకు చూపించకుండా అల్గారిథమ్‌లను సమతుల్యం చేయడంతో సహా మొత్తం 6 మార్గదర్శకాలను కేంద్రం సూచించింది. ఇన్ఫర్మేషన్ టెక్నాలజీ చట్టం 2000, ఐటీ రూల్స్ 2021కి లోబడి ఈ చర్యలు ఉండాలని పేర్కొంది. ఈ అడ్వైజరీ తక్షణమే అమల్లోకి వచ్చేలా తగిన చర్యలు చేపట్టి, తాము తీసుకున్న చర్యల వివరాలను మంత్రిత్వ శాఖకు నివేదించాలని మెటాను ఆదేశించింది.
