శ్రీ ఈశ్వర మార్కండేయ దేవస్థానంలో ఘనంగా దేవి నవరాత్రి ఉత్సవాలు

సదాశివపేట ; పట్టణంలోని శ్రీ ఈశ్వర మార్కండేయ దేవస్థానంలో దేవి నవరాత్రి ఉత్సవాలు భక్తిశ్రద్ధలతో, అంగరంగ వైభవంగా కొనసాగుతున్నాయి. ఆలయ చైర్మన్ గుజ్జరి వెంకన్న బాబు, ఆలయ కమిటీ ఆధ్వర్యంలో ప్రతిరోజూ ఉదయం అమ్మవారికి ప్రత్యేక పూజా కార్యక్రమాలను నిర్వహిస్తున్నారు. శ్రీశ్రీశ్రీ డాక్టర్ బిరుదాంకితులు శ్రీనివాస మూర్తి నేతృత్వంలో వేదమంత్రోచ్ఛారణలు, ఆధ్యాత్మిక కార్యక్రమాలతో ఆలయ ప్రాంగణం భక్తిమయంగా మారుతోంది.
నవరాత్రి ఉత్సవాల్లో భాగంగా ఎనిమిదో రోజైన ఆదివారం శ్రీ దుర్గాదేవి మహాయజ్ఞాన్ని వైభవంగా నిర్వహించారు. ఈ సందర్భంగా అమ్మవారికి ప్రత్యేక పూజలు నిర్వహించి, భక్తులందరితో కలిసి దుర్గాదేవి పంచాక్షరీ మంత్రాన్ని 108 సార్లు జపిస్తూ నామస్మరణ చేశారు. భక్తుల సామూహిక నామస్మరణతో ఆలయ ప్రాంగణం ఆధ్యాత్మిక శోభను సంతరించుకుంది. భక్తులు పెద్ద సంఖ్యలో పాల్గొని అమ్మవారిని దర్శించుకుని ప్రత్యేక పూజల్లో పాల్గొన్నారు.
పూజా కార్యక్రమాల అనంతరం భక్తులందరికీ అన్నప్రసాద వితరణ చేపట్టారు. ఆలయ కమిటీ ఆధ్వర్యంలో భక్తులకు ఎలాంటి అసౌకర్యం కలగకుండా కార్యక్రమాలను సజావుగా నిర్వహించారు. దేవి నవరాత్రుల సందర్భంగా ప్రతిరోజూ ప్రత్యేక పూజలు, ఆధ్యాత్మిక కార్యక్రమాలు నిర్వహిస్తుండటంతో భక్తులు హర్షం వ్యక్తం చేస్తున్నారు.ఈ కార్యక్రమంలో ఆలయ కమిటీ చైర్మన్ గుజ్జరి వెంకన్న బాబు, డైరెక్టర్లు మాలె అనిత, పద్మ మాణిక్యం, కమిటీ సభ్యులు కొంగరి ప్రభు, సంకూరి శివ, నెల్లి కృష్ణ, చిల్వేరి వెంకటేశం, పండాల శివ, మహేష్, గణేష్, సోమశంకర్ తదితరులు పాల్గొన్నారు.