ముద్దాయిపేటలో ఘనంగా బతుకమ్మ సంబరాలు

పుల్కల్  : తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ సంబరాలను 
పుల్కల్ మండల పరిధిలోని ముద్దాయిపేట గ్రామంలో ఆదివారం ఘనంగా నిర్వహించారు.
గ్రామంలోని ఆడపడుచులు వివిధ రకాల రంగురంగుల పూలతో బతుకమ్మలను అందంగా పేర్చి, సంప్రదాయ దుస్తుల్లో వేడుకల్లో పాల్గొన్నారు. బతుకమ్మల చుట్టూ చేరి సంప్రదాయ పాటలు పాడుతూ, ఆటపాటలతో సందడి చేశారు. మహిళల బతుకమ్మ పాటలతో గ్రామంలో పండుగ వాతావరణం నెలకొంది.

గ్రామంలోని మహిళలు, యువతులు పెద్ద సంఖ్యలో పాల్గొని బతుకమ్మలను ఊరేగింపుగా తీసుకెళ్లారు. సంప్రదాయబద్ధంగా బతుకమ్మ పాటలు పాడుతూ పండుగ వేడుకలు జరుపుకున్నారు. అనంతరం చెరువు వద్దకు చేరుకుని, బతుకమ్మలను నీటిలో నిమజ్జనం చేశారు. గ్రామ ప్రజలు ఆనందోత్సాహాల మధ్య పండుగను జరుపుకున్నారు.గ్రామ సర్పంచ్ వినోద యాదయ్య, ఉపసర్పంచ్ పెద్దగొల్ల సత్యనారాయణ, గ్రామ పెద్దలు కమల్‌రెడ్డి, నరేష్ గౌడ్, వార్డు సభ్యుడు శేఖర్ తదితరుల ఆధ్వర్యంలో వేడుకలకు ఏర్పాట్లు చేశారు.