మల్లేశ్వరం దసరా ఉత్సవాలలో ప్లాస్టిక్‌కు స్వస్తి.. స్టీల్ ప్లేట్లు, గ్లాసులతో అన్నసమారాధన!

పెరవలి మేజర్ న్యూస్ :పండుగలంటే భక్తిశ్రద్ధలు, ఆధ్యాత్మిక సందడి మాత్రమే కాదు.. పర్యావరణ పరిరక్షణకు కూడా వేదిక కావాలని నిరూపిస్తున్నారు తూర్పుగోదావరి జిల్లా పెరవలి మండలం మల్లేశ్వరం గ్రామస్తులు.మల్లేశ్వరం గ్రామంలోని చిన్న రథశాల వద్ద నిర్వహిస్తున్న దసరా మహోత్సవాలు పర్యావరణ పరిరక్షణకు ఆదర్శంగా నిలుస్తున్నాయి.దసరా ఉత్సవాల్లో భాగంగా అక్టోబర్ 18వ తేదీ ఆదివారం నిర్వహించిన అన్నసమారాధన కార్యక్రమంలో ప్లాస్టిక్ వస్తువులకు బదులుగా అరటి ఆకులు, స్టీల్ ప్లేట్లు, స్టీల్ గ్లాసులు వినియోగించడం ప్రత్యేక ఆకర్షణగా నిలిచింది. ఈ పర్యావరణ హిత కార్యక్రమం పట్ల భక్తులు హర్షం వ్యక్తం చేశారు.

ఈ సందర్భంగా ఉత్సవ కమిటీ నిర్వాహకులు మాట్లాడుతూ గత ఏడు సంవత్సరాలుగా పూర్తిగా మట్టితో తయారుచేసిన అమ్మవారి విగ్రహాన్ని ప్రతిష్ఠించి భక్తిశ్రద్ధలతో పూజలు నిర్వహిస్తున్నట్లు తెలిపారు.పర్యావరణానికి హాని కలిగించే పదార్థాలతో తయారుచేసిన విగ్రహాలకు బదులుగా సహజసిద్ధమైన మట్టి విగ్రహాలను ఏర్పాటు చేయడం ద్వారా పర్యావరణ పరిరక్షణకు తమవంతు కృషి చేస్తున్నామని వివరించారు.అంతేకాకుండా గత రెండు సంవత్సరాలుగా దసరా ఉత్సవాల్లో నిర్వహించే అన్నదాన కార్యక్రమాల్లో కూడా ప్లాస్టిక్ వినియోగాన్ని నివారిస్తూ అరటి ఆకులు, స్టీల్ ప్లేట్లు, స్టీల్ గ్లాసులు మాత్రమే ఉపయోగిస్తున్నట్లు తెలిపారు.

భక్తుల ఆరోగ్యంతో పాటు పరిసరాల పరిశుభ్రతను దృష్టిలో ఉంచుకొని ఈ విధానాన్ని అమలు చేస్తున్నామని నిర్వాహకులు పేర్కొన్నారు.ప్లాస్టిక్ రహిత ఉత్సవాలే భావితరాలకు మనమిచ్చే గొప్ప కానుక.ఈ సందర్భంగా గ్రామ పెద్దలు మాట్లాడుతూ పండుగలు, దేవాలయ ఉత్సవాలు, అన్నదాన కార్యక్రమాల్లో ప్లాస్టిక్ పూత కలిగిన బఫే ప్లేట్లు, డిస్పోజబుల్ గ్లాసులు, వాటర్ ప్యాకెట్ల వినియోగాన్ని పూర్తిగా తగ్గించాలని కోరారు.అరటి ఆకుల్లో భోజనం చేయడం మన సంప్రదాయంలో శుభప్రదమైన ఆచారమని, సహజసిద్ధమైన ఆకుల వినియోగం పర్యావరణానికి మేలు చేస్తుందని పేర్కొన్నారు.

ఒక్కరోజు జరిగే అన్నదాన కార్యక్రమంలోనే పెద్ద మొత్తంలో ప్లాస్టిక్ వ్యర్థాలు పేరుకుపోతున్నాయని, అవి భూమి, నీటి కాలుష్యానికి కారణమవుతున్నాయని ఆందోళన వ్యక్తం చేశారు.ప్రతి ఉత్సవ కమిటీ పర్యావరణ పరిరక్షణను సామాజిక బాధ్యతగా స్వీకరించాలని, భవిష్యత్ తరాలకు స్వచ్ఛమైన గాలి, పరిశుభ్రమైన నీరు, కాలుష్యరహిత వాతావరణాన్ని అందించేందుకు కృషి చేయాలని పిలుపునిచ్చారు.హిందూ ధర్మ పరిరక్షణ సేవా సమితికి ప్రత్యేక అభినందనలు.పెరవలి కేంద్రంగా హిందూ ధర్మ పరిరక్షణ సేవా సమితి ఆధ్వర్యంలో వివిధ ఆధ్యాత్మిక కార్యక్రమాలు, అన్నదాన కార్యక్రమాలకు ఉచితంగా స్టీల్ ప్లేట్లు, స్టీల్ గ్లాసులు అందించడం అభినందనీయమని గ్రామ పెద్దలు పేర్కొన్నారు.

ఈ సేవా కార్యక్రమాల ద్వారా ప్లాస్టిక్ వినియోగాన్ని తగ్గించేందుకు విశేషంగా కృషి చేస్తున్న హిందీ మాస్టారు సి.సి.హెచ్.వి.ఎస్. నాగభూషణం సేవలను ప్రత్యేకంగా ప్రశంసించారు.అలాగే హిందూ ధర్మ పరిరక్షణ సేవా సమితి సభ్యులు, దాతలు, ప్రోత్సాహకులకు ఉత్సవ కమిటీ నిర్వాహకులు, గ్రామ పెద్దలు, గ్రామస్తులు అభినందనలు తెలియజేశారు.ఆధ్యాత్మికతతో పాటు పర్యావరణ పరిరక్షణకు పెద్దపీట వేస్తున్న మల్లేశ్వరం గ్రామ దసరా ఉత్సవాలు ఇతర గ్రామాలకు ఆదర్శంగా నిలుస్తున్నాయి.ప్రతి గ్రామంలో జరిగే పండుగలు, జాతరలు, అన్నదాన కార్యక్రమాల్లో ఇటువంటి పర్యావరణ హిత విధానాలను అమలు చేస్తే ప్లాస్టిక్ కాలుష్యాన్ని గణనీయంగా తగ్గించవచ్చని గ్రామస్తులు అభిప్రాయపడ్డారు.
దైవారాధనతో పాటు ప్రకృతి పరిరక్షణ కూడా మన బాధ్యతే అనే గొప్ప సందేశాన్ని మల్లేశ్వరం గ్రామస్తులు ఆచరణలో చూపిస్తున్నారు. ప్రకృతిని కాపాడుదాం.. ప్లాస్టిక్‌ను నివారిద్దాం.. భావితరాలకు స్వచ్ఛమైన పర్యావరణాన్ని అందిద్దాం.