శంషాబాద్ విమానాశ్రయంలో తప్పిన పెను ప్రమాదం
సాంకేతిక లోపంతో విజయవాడ వెళ్తున్న విమానం అత్యవసర ల్యాండింగ్.. సురక్షితంగా బయటపడిన ప్రయాణికులు
హైదరాబాద్: శంషాబాద్ అంతర్జాతీయ విమానాశ్రయంలో పెను ప్రమాదం తప్పింది. సాంకేతిక లోపాన్ని గుర్తించిన ఓ విమానం టేకాఫ్ అయిన కొద్దిసేపటికే తిరిగి విమానాశ్రయానికి చేరుకుని అత్యవసరంగా ల్యాండైంది. దీంతో విమానంలోని ప్రయాణికులు, సిబ్బంది ఊపిరి పీల్చుకున్నారు.
శంషాబాద్ నుంచి విజయవాడకు బయలుదేరిన 591 విమానం టేకాఫ్ అయిన కొద్దిసేపటికే పైలట్ సాంకేతిక సమస్యను గుర్తించారు. వెంటనే విమానాశ్రయంలోని విమాన రాకపోకల నియంత్రణ కేంద్రానికి సమాచారం అందించారు. పరిస్థితిని వివరించి తిరిగి శంషాబాద్ విమానాశ్రయానికి రావడానికి అనుమతి కోరారు.
విమానాశ్రయ అధికారులు అప్రమత్తమై అత్యవసర ల్యాండింగ్కు అవసరమైన ఏర్పాట్లు చేశారు. కొద్దిసేపటి తర్వాత విమానం శంషాబాద్ విమానాశ్రయంలో సురక్షితంగా ల్యాండ్ అయింది. విమానం సురక్షితంగా దిగడంతో ప్రయాణికులు ఊపిరి పీల్చుకున్నారు.
సాంకేతిక లోపానికి కారణాలపై అధికారులు పరిశీలన చేపట్టారు. విమానంలో ఉన్న ప్రయాణికులు, సిబ్బంది సురక్షితంగా ఉన్నట్లు సమాచారం.
