విద్యార్థులకు చట్టంపై అవగాహన కల్పించిన జడ్జి వంశీకృష్ణ

అనపర్తి,  మేజర్ న్యూస్. విద్యార్థులు విద్యాభ్యాస దశ నుంచే చట్టాలు, హక్కులు, బాధ్యతలపై అవగాహన కలిగి ఉండాలని అనపర్తి జూనియర్ సివిల్ జడ్జి ఎం. వంశీకృష్ణ అన్నారు. అనపర్తిలోని శ్రీ కర్రీ అప్పారావు జిల్లా పరిషత్ ఉన్నత పాఠశాలలో బుధవారం న్యాయ విజ్ఞాన సదస్సు నిర్వహించారు.ఈ సందర్భంగా జడ్జి వంశీకృష్ణ మాట్లాడుతూ.. విద్యార్థులు కేవలం విద్యలోనే కాకుండా సమాజంలో ప్రతి పౌరుడికి ఉన్న హక్కులు, బాధ్యతలు, చట్టపరమైన అంశాలపై కూడా అవగాహన పెంపొందించుకోవాలని సూచించారు. బాలల హక్కులు, మహిళల రక్షణ, సైబర్ నేరాలు, బాల్య వివాహాలు, మాదకద్రవ్యాల దుష్ప్రభావాలు తదితర అంశాలపై విద్యార్థులు అవగాహన కలిగి ఉండాల్సిన అవసరం ఉందన్నారు.చట్టాలపై సరైన అవగాహన ఉంటే సమస్యలు ఎదురైనప్పుడు వాటిని చట్టబద్ధంగా పరిష్కరించుకునే అవకాశం ఉంటుందని తెలిపారు. విద్యార్థులు తమకు తెలిసిన న్యాయ విషయాలను కుటుంబ సభ్యులు, స్నేహితులకు కూడా తెలియజేసి సమాజంలో న్యాయ అవగాహన పెంపొందించేందుకు కృషి చేయాలని కోరారు. విద్యార్థులు ప్రశ్నించే తత్వాన్ని అలవర్చుకుని, సందేహాలను న్యాయ నిపుణులను అడిగి నివృత్తి చేసుకోవాలని సూచించారు.సదస్సులో జూనియర్ సివిల్ జడ్జి బార్ అసోసియేషన్ అధ్యక్షుడు శ్రీనివాసరెడ్డి, కార్యదర్శి రమణమూర్తి, న్యాయవాది లక్ష్మీనారాయణరెడ్డి పాల్గొని విద్యార్థులకు పలు న్యాయపరమైన అంశాలపై అవగాహన కల్పించారు. చట్టాలను గౌరవించడం, నిబంధనలను పాటించడం ద్వారా బాధ్యతాయుతమైన పౌరులుగా ఎదగాలని వారు సూచించారు.ఈ కార్యక్రమంలో పాఠశాల ఉపాధ్యాయులు, విద్యార్థులు పాల్గొన్నారు.