రూ.9 చీరల కోసం ఎగబడ్డ మహిళలు.. యాదాద్రి భువనగిరి జిల్లాలో మాల్ ఓపెనింగ్లో తోపులాట
సూర్య క్రైమ్ డెస్క్: యాదాద్రి భువనగిరి జిల్లాలో షాపింగ్ మాల్ ప్రారంభోత్సవ వేడుక తీవ్ర ఉద్రిక్తతకు దారితీసింది. ప్రముఖ నటి మీనాక్షి చౌదరి చేతుల మీదుగా ప్రారంభమైన గరుడ షాపింగ్ మాల్ నిర్వాహకులు గ్రాండ్ ఓపెనింగ్ సందర్భంగా కేవలం రూ.9లకే ఒక చీర ఇస్తామని భారీ ప్రకటన చేశారు. ఈ బంపర్ ఆఫర్ గురించి తెలుసుకున్న చుట్టుపక్కల ప్రాంతాల మహిళలు పెద్ద ఎత్తున మాల్ వద్దకు పోటెత్తారు.
తక్కువ ధరకే చీరను దక్కించుకోవాలన్న ఆత్రుతతో మహిళలు ఒక్కసారిగా లోపలికి వెళ్లేందుకు ప్రయత్నించడంతో తీవ్ర తోపులాట చోటుచేసుకుంది. జనాలను అదుపు చేయడం సెక్యూరిటీ సిబ్బందికి తలకు మించిన భారంగా మారడంతో పరిస్థితి పూర్తిగా అదుపుతప్పి గందరగోళంగా మారింది. ఈ తొక్కిసలాట మరియు తోపులాటలో పలువురు మహిళలకు స్వల్ప గాయాలైనట్లు సమాచారం. ఆఫర్ల పేరుతో నిబంధనలు పాటించకుండా సరైన భద్రతా ఏర్పాట్లు చేయకపోవడం వల్లే ఈ పరిస్థితి తలెత్తిందని స్థానికులు మండిపడుతున్నారు.
