ఆదిలాబాద్ రిమ్స్లో తీవ్ర విషాదం.. ఏసీ పేలి ఐదు రోజుల శిశువు మృతి, ముగ్గురి పరిస్థితి విషమం
సూర్య క్రైమ్ డెస్క్: ఆదిలాబాద్లోని రాజీవ్ గాంధీ ఇన్స్టిట్యూట్ ఆఫ్ మెడికల్ సైన్సెస్ (రిమ్స్) ఆసుపత్రిలో ఘోర ప్రమాదం చోటుచేసుకుంది. ఆసుపత్రిలోని ఎస్ఎన్సీయూ (SNCU) వార్డులో షార్ట్సర్క్యూట్ కారణంగా ఏసీ ఒక్కసారిగా పేలిపోవడంతో దట్టమైన పొగలు అలుముకున్నాయి. ఈ ప్రమాదంలో కేవలం ఐదు రోజుల వయసున్న పసికందు ఊపిరాడక మృతి చెందడం స్థానికంగా తీవ్ర విషాదాన్ని నింపింది.
ఈ ఘటనతో వార్డులో ఒక్కసారిగా భయాందోళన వాతావరణం నెలకొంది. అప్రమత్తమైన ఆసుపత్రి సిబ్బంది వెంటనే విద్యుత్ సరఫరాను నిలిపివేసి, అగ్నిమాపక సిబ్బంది సహాయంతో మిగిలిన చిన్నారులను పక్క వార్డుకు సురక్షితంగా తరలించారు. ఈ ప్రమాద సమయంలో వార్డులో చికిత్స పొందుతున్న మొత్తం 24 మంది చిన్నారులను వేగంగా వేరే ప్రాంతాలకు మార్చగా, వారిలో ముగ్గురి పరిస్థితి మాత్రం విషమంగా ఉన్నట్లు సమాచారం.
ఈ దారుణ ఘటనపై సమాచారం అందుకున్న వెంటనే జిల్లా కలెక్టర్ రాజర్షి షా, మాజీ ఎమ్మెల్యే జోగు రామన్న తదితరులు రిమ్స్కు చేరుకున్నారు. పరిస్థితిని స్వయంగా సమీక్షించి, బాధితులకు మెరుగైన వైద్యం అందించాలని అధికారులను ఆదేశించారు. ఆసుపత్రి సిబ్బంది నిర్లక్ష్యం లేదా సాంకేతిక లోపాలపై సమగ్ర విచారణ చేపట్టాలని ప్రజలు, బాధిత కుటుంబ సభ్యులు డిమాండ్ చేస్తున్నారు.
