ఆదిలాబాద్ రిమ్స్ అగ్నిప్రమాదం: ఇద్దరు పసికందుల మృతిపై సీఎం రేవంత్ రెడ్డి తీవ్ర దిగ్భ్రాంతి
హైదరాబాద్::ఆదిలాబాద్లోని రిమ్స్ (RIMS) ఆసుపత్రి ఎస్ఎన్సీయూ (SNCU) వార్డులో జరిగిన ఘోర అగ్నిప్రమాదంపై రాష్ట్ర ముఖ్యమంత్రి రేవంత్ రెడ్డి తీవ్ర దిగ్భ్రాంతి వ్యక్తం చేశారు. ఈ హృదయ విదారక ఘటనలో ఇద్దరు చిన్నారులు ప్రాణాలు కోల్పోవడం అత్యంత బాధాకరమని ఆయన ఆవేదన వ్యక్తం చేశారు. పసికందులను కోల్పోయిన ఆయా కుటుంబాలకు సీఎం తన ప్రగాఢ సానుభూతిని తెలియజేశారు.
ఈ ఘటనపై తక్షణమే స్పందించిన ముఖ్యమంత్రి.. అధికారులకు కీలక ఆదేశాలు జారీ చేశారు. ఆసుపత్రిలో అగ్నిప్రమాదం నుంచి బయటపడి, ప్రస్తుతం చికిత్స పొందుతున్న ఇతర చిన్నారులందరికీ అత్యుత్తమ వైద్య సేవలు అందించాలని ఆదేశించారు. వారి ఆరోగ్య పరిస్థితిని నిరంతరం ఎప్పటికప్పుడు పర్యవేక్షిస్తూ, అవసరమైన అన్ని వైద్య సౌకర్యాలను అందుబాటులో ఉంచాలని సూచించారు.
అలాగే, ఈ అగ్నిప్రమాదానికి దారితీసిన కచ్చితమైన కారణాలపై అత్యవసరంగా సమగ్ర విచారణ జరిపించి, పూర్తి స్థాయి నివేదికను తనకు సమర్పించాలని అధికారులను సీఎం ఆదేశించారు.
భవిష్యత్తులో రాష్ట్రంలో ఇలాంటి విషాద ఘటనలు ఎక్కడా పునరావృతం కాకుండా కఠిన చర్యలు తీసుకోవాలని ముఖ్యమంత్రి స్పష్టం చేశారు. ఇందులో భాగంగా రాష్ట్రవ్యాప్తంగా ఉన్న అన్ని ఆసుపత్రుల్లో అగ్నిమాపక (ఫైర్ సేఫ్టీ), విద్యుత్ భద్రతా ప్రమాణాలను వెంటనే తనిఖీ చేసి, భద్రతా చర్యలను మరింత పటిష్టం చేయాలని యంత్రాంగానికి ఆయన స్పష్టమైన ఆదేశాలు ఇచ్చారు.
