ఆదిలాబాద్ రిమ్స్‌లో విద్యుత్ షార్ట్ సర్క్యూట్ ఘటనపై వికారాబాద్ మాజీ ఎమ్మెల్యే డాక్టర్ మెతుకు ఆనంద్ తీవ్ర దిగ్భ్రాంతి

వికారాబాద్ జిల్లా ప్రతినిధి, మేజర్ న్యూస్ (సెప్టెంబర్ 22):ఆదిలాబాద్ జిల్లా కేంద్రంలోని రిమ్స్ ఆసుపత్రిలో చోటుచేసుకున్న విద్యుత్ షార్ట్ సర్క్యూట్ ప్రమాదంలో ముగ్గురు పసికందులు ప్రాణాలు కోల్పోవడం అత్యంత బాధాకరమని వికారాబాద్ మాజీ ఎమ్మెల్యే డాక్టర్ మెతుకు ఆనంద్ తీవ్ర ఆవేదన వ్యక్తం చేశారు. పసిపిల్లలకు అత్యంత భద్రత కల్పించాల్సిన చిన్నారుల వార్డులో ఇలాంటి ఘటన జరగడం ప్రభుత్వ ఆసుపత్రుల నిర్వహణపై తీవ్రమైన ప్రశ్నలను లేవనెత్తుతోందని ఆయన విమర్శించారు. ఈ దుర్ఘటనలో మరో ఇరవై మూడు మంది పసికందులు గాయపడిన నేపథ్యంలో, వారందరికీ ఎలాంటి జాప్యం చేయకుండా అత్యుత్తమ వైద్యం అందించి ప్రాణాలను కాపాడేందుకు ప్రభుత్వం యుద్ధ ప్రాతిపదికన చర్యలు తీసుకోవాలని ఆయన గట్టిగా డిమాండ్ చేశారు.​ప్రభుత్వ ఆసుపత్రులలో విద్యుత్ వ్యవస్థ, ఫైర్ సేఫ్టీ, అత్యవసర పరిస్థితుల్లో తీసుకోవాల్సిన జాగ్రత్తలు మరియు వైద్య పరికరాల నిర్వహణ వంటి కీలక అంశాలపై అధికారులు పూర్తి స్థాయిలో సమీక్ష చేయాల్సిన అవసరం ఎంతైనా ఉందని డాక్టర్ మెతుకు ఆనంద్ అభిప్రాయపడ్డారు. రిమ్స్ ఆసుపత్రిలో నెలకొన్న సమస్యలను గతంలోనే ప్రతిపక్ష నాయకులు ప్రభుత్వ దృష్టికి తీసుకువచ్చినప్పటికీ, స్పందించి తగిన చర్యలు తీసుకోకపోవడం వల్లే ఇటువంటి దారుణమైన పరిస్థితి తలెత్తిందని ఆయన మండిపడ్డారు. ప్రజల ప్రాణాలకు సంబంధించిన సున్నితమైన అంశాలలో ప్రభుత్వం ఎలాంటి నిర్లక్ష్యానికి తావివ్వకూడదని స్పష్టం చేస్తూ, ఈ ఘటనపై ఉన్నతస్థాయి మరియు నిష్పక్షపాత విచారణ జరిపించి బాధ్యులైన వారిపై కఠిన చర్యలు తీసుకోవాలని కోరారు.ఆదిలాబాద్ రిమ్స్‌తో పాటు రాష్ట్రంలోని అన్ని ప్రభుత్వ ఆసుపత్రులలోని చిన్నారుల వార్డులు, ఎన్‌ఐసీయూలు, ఐసీయూలు, విద్యుత్ లైన్లు మరియు ఫైర్ సేఫ్టీ ఏర్పాట్లపై నిపుణుల బృందాలతో తక్షణమే తనిఖీలు నిర్వహించాలని ఆయన ప్రభుత్వాన్ని కోరారు. భవిష్యత్తులో ఇలాంటి విషాదకరమైన ఘటనలు పునరావృతం కాకుండా కట్టుదిట్టమైన శాశ్వత భద్రతా చర్యలను అమలు చేయాలని సూచించారు. తమ కంటిపాపలను కోల్పోయి పుట్టెడు దుఃఖంలో మునిగిపోయిన బాధిత కుటుంబాల క్షోభను వర్ణించలేమని పేర్కొంటూ, ప్రభుత్వం వెంటనే స్పందించి మృతుల కుటుంబాలకు ఇరవై ఐదు లక్షల రూపాయల చొప్పున ఎక్స్‌గ్రేషియా ప్రకటించి ఆదుకోవాలని బిఆర్ఎస్ పార్టీ తరఫున ఆయన డిమాండ్ చేశారు.