అల్పపీడనం నేపథ్యంలో అధికార యంత్రాంగం అప్రమత్తం

విశాఖపట్నం, సెప్టెంబర్ 22, మేజర్ న్యూస్: బంగాళాఖాతంలో అల్పపీడనం ఏర్పడటంతో జిల్లాలో భారీ వర్షాలు కురుస్తున్న నేపథ్యంలో జిల్లా అధికార యంత్రాంగం అప్రమత్తంగా ఉండాలని కలెక్టర్ అభిషిక్త్ కిషోర్ అధికారులను ఆదేశించారు. ఎలాంటి అవాంఛనీయ సంఘటనలు చోటుచేసుకోకుండా ముందస్తు జాగ్రత్త చర్యలు చేపట్టాలని సూచించారు.

ప్రత్యేక బృందాలను ఏర్పాటు చేసి వర్షాలు, వరదలు, ఇతర పరిస్థితులను ఎప్పటికప్పుడు సమీక్షించాలని ఆదేశించారు. GVMC, జిల్లా కలెక్టరేట్‌లో కంట్రోల్ రూమ్‌లను ఏర్పాటు చేసి అత్యవసర పరిస్థితుల్లో తక్షణమే స్పందించేలా చర్యలు చేపట్టాలని తెలిపారు. వాతావరణ పరిస్థితులు అనుకూలించే వరకు మత్స్యకారులు సముద్రంలో వేటకు వెళ్లరాదని కలెక్టర్ సూచించారు.