రాజాబాబుకు చక్రాల కుర్చీ.. కుటుంబానికి కొత్త ఆశ
విశాఖపట్నం, సెప్టెంబర్ 22, మేజర్ న్యూస్: మానవత్వం, సేవాభావానికి ప్రతీకగా ఉక్కునగరం శ్రీ సత్యసాయి సేవా సమితి ఆధ్వర్యంలో అచ్చుతాపురం ఎస్ఈజెడ్ కాలనీ సమీపంలోని దిబ్బపాలెం గ్రామానికి చెందిన అండే రాజాబాబుకు చక్రాల కుర్చీని అందజేశారు. దినసరి కూలీ చిన అప్పారావు కుమారుడైన రాజాబాబు చిన్ననాటి నుంచే పోలియో కారణంగా నడవలేని పరిస్థితిలో ఉన్నారు.
రోజువారీ అవసరాలకు ఇతరులపై ఆధారపడుతున్న రాజాబాబుకు చక్రాల కుర్చీ అందడంతో ఇకపై సులభంగా కదలడానికి, కొంతవరకు స్వతంత్రంగా తన పనులు చేసుకోవడానికి అవకాశం కలగనుంది. ఏళ్లుగా కుమారుడి ఇబ్బందులను చూస్తున్న వృద్ధ తల్లిదండ్రులకు ఈ సహాయం ఎంతో ఊరటనిచ్చింది.
ఉక్కునగరం శ్రీ సత్యసాయి సేవా సమితి అభ్యర్థన మేరకు చక్రాల కుర్చీని అందించేందుకు ఏఎంఈజెడ్ (AMTZ)లోని ఉక్కునగరం డీపీఎస్ పాఠశాలలో పనిచేస్తున్న టి.ఎన్. నాగిని ఆర్థిక సహకారం అందించారు. ఆమె సహకారంతో చక్రాల కుర్చీని సమకూర్చి రాజాబాబుకు అందజేశారు.
ఈ సందర్భంగా ఉక్కునగరం శ్రీ సత్యసాయి సేవా సమితి కన్వీనర్ డి.ఏ.వి. సన్యాసిరాజు మాట్లాడుతూ.. సేవా కార్యక్రమానికి ఆర్థిక సహకారం అందించిన టి.ఎన్. నాగినికి ప్రత్యేక కృతజ్ఞతలు తెలిపారు. “మానవ సేవే మాధవ సేవ” అనే స్ఫూర్తితో అవసరంలో ఉన్నవారికి అండగా నిలవడమే సమితి లక్ష్యమని పేర్కొన్నారు.
రాజాబాబుకు అందించిన చక్రాల కుర్చీ ఆయన కదలికకు మాత్రమే కాకుండా, కుటుంబంలో కొత్త ఆశను నింపిందని గ్రామస్థులు పేర్కొన్నారు. సేవా కార్యక్రమానికి సహకరించిన ఉక్కునగరం శ్రీ సత్యసాయి సేవా సమితి ప్రతినిధులకు కృతజ్ఞతలు తెలిపారు.
