అక్టోబర్ నుంచి కొత్త పింఛన్లు: దసరా ముందే పంపిణీకి తెలంగాణ ప్రభుత్వం ఆదేశాలు!
హైదరాబాద్: సూర్య న్యూస్ నెట్వర్క్ :రాష్ట్రంలో అర్హులైన నిరుపేదలకు తెలంగాణ ప్రభుత్వం తీపి కబురు అందించింది. అక్టోబర్ మాసం నుంచి కొత్తగా సామాజిక భద్రత పింఛన్లను పంపిణీ చేయాలని నిర్ణయించింది. ప్రజలంతా సంతోషంగా దసరా పండగ జరుపుకునేలా, పండుగకు ముందే లబ్ధిదారులకు పింఛన్ సొమ్ము అందేలా చర్యలు తీసుకోవాలని సంబంధిత అధికారులను ఆదేశించింది.
**వేగంగా దరఖాస్తుల వెరిఫికేషన్**
కొత్త పింఛన్ల మంజూరుకు సంబంధించి క్షేత్రస్థాయిలో దరఖాస్తుల పరిశీలన (వెరిఫికేషన్) ప్రక్రియను మరింత వేగవంతం చేయాలని ప్రభుత్వం స్పష్టం చేసింది. అర్హులైన లబ్ధిదారుల గుర్తింపులో ఎలాంటి జాప్యం జరగకూడదని పేర్కొంది. పరిశీలన ప్రక్రియను నిర్ణీత గడువులోగా పూర్తి చేసేందుకు అవసరమైతే అదనపు సిబ్బందిని నియమించుకోవాలని కూడా అధికారులకు సూచించింది.
**వితంతువులు, ఒంటరి మహిళలపై ప్రత్యేక దృష్టి**
దరఖాస్తు చేసుకున్న అర్హులందరికీ పూర్తిస్థాయిలో పింఛన్లు అందేలా చర్యలు చేపడుతున్నారు. ముఖ్యంగా వితంతువులు, ఒంటరి మహిళలకు వంద శాతం పింఛన్లు వర్తించేలా ప్రభుత్వం ప్రత్యేక ప్రాధాన్యతనిచ్చింది. ప్రభుత్వ నిర్ణయంతో రాష్ట్రవ్యాప్తంగా వేలాది మంది కొత్త లబ్ధిదారులకు దసరా కానుకగా ఆర్థిక ఆసరా లభించనుంది.
