ఉద్యమకారులకు ప్రజా ప్రభుత్వం అండ: సీఎం రేవంత్ రెడ్డి కేదారి-పుష్పలత కుటుంబానికి రూ. 10 లక్షల ఆర్థిక సాయం ప్రకటన

హనుమకొండ / హైదరాబాద్:తెలంగాణ మలిదశ స్వరాష్ట్ర సాధన ఉద్యమంలో విశేష సేవలందించిన హనుమకొండకు చెందిన దివంగత లింగాల కేదారి - పుష్పలత దంపతుల కుటుంబానికి రాష్ట్ర ప్రభుత్వం రూ. 10 లక్షల ఆర్థిక సాయం ప్రకటించింది. హనుమకొండలో ఒక సాధారణ హోటల్ నడుపుతూ, వ్యాపార కోణంతో కాకుండా కేవలం మానవతా దృక్పథంతో వ్యవహరించి ఉద్యమకారులకు, విద్యార్థులకు ఉచితంగా ఆహారం, టీ అందించిన గొప్ప మహానుభావులు కేదారి దంపతులని ముఖ్యమంత్రి ఎ. రేవంత్ రెడ్డి కొనియాడారు.

ఈ సందర్భంగా సీఎం రేవంత్ రెడ్డి మాట్లాడుతూ... “అన్నం పరబ్రహ్మ స్వరూపమని, దానిని వృథా చేయకూడదని సమాజానికి అవగాహన కల్పించిన ఆ పుణ్యదంపతుల సేవలు అపూర్వమైనవి. ఉద్యమ సమయంలో వారు అందించిన సేవలకు గుర్తింపుగా, ప్రభుత్వం తరఫున వారి కుటుంబానికి చిన్న నివాళిగా రూ. 10 లక్షల ఆర్థిక సాయం మంజూరు చేస్తున్నాం” అని తెలిపారు. సీఎం సహాయ నిధి (CMRF) ద్వారా ఈ మొత్తాన్ని వారి కుటుంబ సభ్యులకు తక్షణమే అందజేయాలని హనుమకొండ జిల్లా కలెక్టర్‌ను ఆదేశించారు.

ఇందిరమ్మ క్యాంటీన్లకు స్ఫూర్తి:

లింగాల కేదారి దంపతుల సేవా స్ఫూర్తిని కొనసాగిస్తూ, రాష్ట్రవ్యాప్తంగా 'ఇందిరమ్మ క్యాంటీన్ల' ద్వారా వీలైనంత ఎక్కువ మందికి తక్కువ ధరకు నాణ్యమైన భోజనం అందించాలనే లక్ష్యంతో ప్రజా ప్రభుత్వం కృషి చేస్తోందని ముఖ్యమంత్రి పేర్కొన్నారు.

ఉద్యమకారుడు మండల రాజు కుటుంబానికి రూ. 5 లక్షలు:

దీంతోపాటు, 2013 మలిదశ ఉద్యమంలో చురుగ్గా పాల్గొని జైలుకు వెళ్లిన జయశంకర్ భూపాలపల్లి జిల్లా గొర్లవీడుకు చెందిన ఉద్యమకారుడు మండల రాజు (34) కుటుంబానికి అమరుల కోటా కింద రూ. 5 లక్షల ఆర్థిక సాయాన్ని సీఎం రేవంత్ రెడ్డి మంజూరు చేశారు. ఉద్యమకారులను మరియు అమరుల కుటుంబాలను అన్ని విధాలా ఆదుకోవడానికి ప్రజా ప్రభుత్వం సిద్ధంగా ఉందని ఈ సందర్భంగా సీఎం పునరుద్ఘాటించారు.